Kontrabandë dhe evazion! Krimi ekonomik bastis Elite Post dhe Express 24
Policia e Tiranës, në bashkëpunim me Prokurorinë pranë Gjykatës së Shkallës së Parë të Juridiksionit të Përgjithshëm, ka ndërmarrë një aksion ndaj disa subjekteve që ofrojnë shërbime postare në kryeqytet, në kuadër të një hetimi për evazion fiskal.
Burime bëjnë me dije se gjatë kontrolleve janë sekuestruar kompjuterë dhe dokumente në zyrat e Elite Post dhe Expres24 Post, ndërsa dyshohet se këto kompani kanë pranuar dhe shpërndarë mallra të pa zhdoganuar dhe pa fatura tatimore. Hetimi po ndiqet nga prokurori Ndini Tavani dhe sektori i Krimit Ekonomik në Policinë e Tiranës.
Nga veprimet hetimore të deritanishme janë sekuestruar mallra me vlerë rreth 13 milionë lekë, të marra në dorëzim pa dokumentacion tatimor, si dhe dokumente të tjera shoqëruese që dyshohet se provojnë veprimtari të paligjshme në drejtim të evazionit fiskal. Gjithashtu, janë gjetur edhe shuma parash që dyshohet se rrjedhin nga aktiviteti i kundërligjshëm.
Hetimet vijojnë për identifikimin e shitësve realë dhe dokumentimin e plotë të veprimtarisë së dyshuar kriminale.
Njoftimi zyrtar i Prokurorisë:
Prokuroria pranë Gjykatës së Shkallës së Parë të Juridiksionit të Përgjithshëm Tiranë regjistron procedimin penal nr.156, viti 2026, për veprën penale të evazionit fiskal, të parashikuar nga neni 180 i Kodit Penal.
Pas lejimit nga gjykata, me kërkesë të organit procedues, u ushtruan kontrolle në disa subjekte që ofrojnë shërbime postare në kryeqytet.
Nga kontrollet janë sekuestruar mallra të marra në dorëzim pa fatura tatimore me vlerë rreth 13 milionë lekë, dokumentacion shoqërues dhe shuma parash që dyshohen se rrjedhin nga aktiviteti i paligjshëm.
Hetimet vijojnë për identifikimin e shitësve realë dhe dokumentimin e plotë të veprimtarisë së kundërligjshme.