Personi në foto është Eno Agasi . Sipas Policisë së Shtetit, Eno Agasi është shpallur në kërkim dhe dyshohet se ka lidhje me zhdukjen e një sasie të konsiderueshme vere, të sekuestruar nga SPAK gjatë kontrolleve në një nga zyrat e Ergys Agasit. Bëhet fjalë për shishe vere me vlerë që, sipas burimeve hetimore, kap shifra deri në disa milionë euro.
Vera, e cila ishte konfiskuar zyrtarisht në kuadër të hetimeve të SPAK, rezulton se është zhdukur ndërkohë që ndodhej nën sekuestro. Së bashku me të, sipas informacioneve, është zhdukur edhe një nga serverat e sekuestruar në të njëjtën zyrë, duke ngritur dyshime serioze mbi sigurinë e provave dhe zinxhirin e përgjegjësisë institucionale.
Burime pranë çështjes bëjnë me dije se bëhet fjalë për një sasi vere pa pullë fiskale, me vlerë të jashtëzakonshme për realitetin shqiptar. Megjithatë, pavarësisht rëndësisë së çështjes dhe dyshimeve për shkelje të rënda, deri më tani nuk ka pasur asnjë reagim publik nga prokurori që mbante përgjegjësinë për këtë dosje, Bledar Vatnikaj.
Në të njëjtën linjë heshtjeje ndodhet edhe Drejtori i Përgjithshëm i Doganave, institucion që ka përgjegjësi direkte për mallrat pa pullë dhe qarkullimin e tyre. Asnjë sqarim, asnjë njoftim dhe asnjë transparencë mbi fatin e një pasurie të sekuestruar që, sipas burimeve, kap vlera të paimagjinueshme për një vend si Shqipëria.
Ndërkohë, autoritetet përgjegjëse vijojnë të heshtin, ndërsa Eno Agasi është shpallur zyrtarisht në kërkim. Rasti ngre pikëpyetje serioze jo vetëm mbi zhdukjen e provave materiale, por edhe mbi funksionimin e mekanizmave të ruajtjes së sekuestrimeve dhe përgjegjësinë institucionale në çështje të ndjeshme që lidhen me pasuri me vlerë shumë të lartë.