Drejtori i Përgjithshëm i Doganave, Gent Gazheli, është parë së fundmi me një xhup Loro Piana, model Kiku patch-pocket bomber jacket, me çmim rreth 8 000 euro. Veshja e zgjedhur nga Gazheli është një prej artikujve më luksozë në botë, dhe ka tërhequr vëmendjen e qytetarëve, për shkak të kostos që përkon me rrogat vjetore të dhjetëra familjeve shqiptare, në një kohë kur vendi renditet mes ekonomive me pagat më të ulëta në Europë dhe me kosto jetese gjithnjë në rritje.
MASKA.Al shkruan: Një xhup Loro Piana, model Kiku patch-pocket bomber jacket, me çmim plot 8,001 dollarë, është “outfit”, që ka zgjedhur drejtori i Përgjithshëm i Doganave, Gent Gazheli.
Gent Gazheli pjesë e skandalit Bankers! Mbajti në sirtar për disa vite gjobën 130 milionë euro
Gazheli nuk është i panjohur për shpenzimet luksoze; më parë është shfaqur edhe me veshje të markave si Brunello Cucinelli, ndërsa vartësit e tij e kanë cilësuar si “Drejtori i 2030-s”. Media kanë nisur ta quajnë ironikisht “Don Zhuani i Doganave”, për stilin dhe luksin që shfaq në publik.
Por ndërkohë që xhupi i shtrenjtë bën bujë, borxhi doganor i vendit vijon të rritet. Sipas të dhënave të KLSH, në fund të vitit 2024, detyrimet e papaguara doganore arritën në 48.6 miliardë lekë, ku 90% e tyre janë më të vjetra se pesë vjet, një tregues i mosfunksionimit të mekanizmave të rikuperimit. Pjesa më e madhe e shlyerjeve për vitin 2024 ka qenë vetëm 0.84% e stokut total.
Gazheli thuhet se ka gjetur një shtëpi në Zvicër dhe po përgatit familjen për zhvendosje, në rast të një arrestimi të mundshëm nga SPAK. Ai dyshohet të ketë qenë i përfshirë në transferime me çanta parash të lidhura me Belinda Ballukun, ndërkohë që është i njohur si njeri i saj i besuar.
Skandali i pezulluar:
Dosja e njohur për publikun lidhet me gjobën ndaj Bankers Petroleum, e cila fillimisht ishte vendosur në 30 milionë euro, por më pas u rrit në 130 milionë euro. Hetimi filloi në 2020, por gjoba mbeti e pezulluar për pesë vite, ndërkohë që Gazheli dyshohet se ka penguar zbatimin e vendimit përmes mosveprimit administrativ dhe takimeve personale me përfaqësues të kompanisë.
Shefi i Doganës së Fierit, Olti Kuke, që kishte raportuar për gjobën, është shkarkuar kohët e fundit, ndërkohë që çështja është ngritur publikisht vetëm pas transferimit të dosjes tek SPAK, duke nxitur dyshime mbi lidhjet politike që sipas burimeve e kanë mbrojtur Gazhelin në rastet e skandaleve brenda doganave.
Kombinimi i luksit ekstrem me përgjegjësitë e paplotësuara financiare dhe skandalet e pezulluara ka rikthyer vëmendjen mbi Gent Gazhelin, një figurë që shihet si simbol i lidhjes mes pushtetit, parave dhe pandëshkueshmërisë brenda sistemit doganor.
