Më 15 shtator, pronari i kompanive “Soft & Solution” dhe “Horizon”, Ermal Beqiri, është paraqitur në ambientet e SPAK, ku është marrë në pyetje nga agjentët e BKH.
Kjo është hera e parë që Beqiri shfaqet fizikisht në Prokurorinë e Posaçme, disa javë pasi hetuesit ushtruan një kontroll blic në zyrat e tij në Tiranë, duke sekuestruar dokumente që dyshohet se mund të zbardhin skemën e shpërndarjes së tenderëve publikë në fushën e teknologjisë së informacionit.
Hetimi i tenderëve të AKSHI
SPAK ka hapur një hetim të gjerë mbi procedurat e zhvilluara nga Agjencia Kombëtare e Shoqërisë së Informacionit (AKSHI), ku përveç Beqirit janë përfshirë edhe emra të tjerë me ndikim në këtë sektor.
Në këtë kuadër është thirrur më herët edhe drejtuesja e AKSHI-t, znj. Mirlinda Karçanaj. Ende nuk është e qartë nëse prania e saj dhe ajo e Beqirit lidhen me të njëjtën dosje apo me hetime të veçuara.
Gjatë pesë viteve të fundit, “Soft & Solution” ka përfituar mbi 23 milionë euro tenderë publikë, duke konkurruar kryesisht me kompaninë “Advanced Business Solution” të Gerond Meçes. Dy kompanitë kanë dominuar tregun e IT-së publike, shpesh duke u përballur mes tyre edhe në Komisionin e Prokurimit Publik (KPP) për ankimime mbi procedurat.
Profili i kompanive të Beqirit
• “Soft & Solution” është krijuar në vitin 2011 nga Enida Puto dhe Vjollca Vasjari. Pronësia ka kaluar përmes disa duarve deri në vitin 2021, kur Arjola Koromani ia shiti shoqërinë Ermal Beqirit për 1 milion lekë. Megjithatë, Koromani vijon të mbajë postin e administratores.
• Në vitin 2024, Beqiri ka zgjeruar ndjeshëm aktivitetin e tij, duke:
• Themeluar “R&D Solution” (mars 2024), me administratore po Arjola Koromanin.
• Blerë “IT Tirana” (prill 2024) për 144 mijë euro, e cila më pas u riemërua “NSolution”.
• Blerë për 380 mijë euro kompaninë “Horizon” (maj 2024), nga një shoqëri offshore në Qipro – “Comscope Limited”, me përfaqësues Vasileios Stachos, i cili vijon të mbajë ende postin e administratorit.
Pyetjet që ngre rasti Beqiri
• A është Ermal Beqiri thjesht një aktor i dukshëm në këtë treg, ndërsa pas tij fshihen interesa të tjera ekonomike e politike?
• Pse të njëjtët emra, si Arjola Koromani, vazhdojnë të shfaqen në disa kompani që lidhen me Beqirin?
• Çfarë roli kanë shoqëritë offshore në këto transaksione dhe kush janë përfituesit realë përfundimtarë?
• A kemi të bëjmë me një treg të mbyllur ku tenderët publikë ndahen mes pak operatorësh, që garojnë “kokë më kokë” por përfitojnë rregullisht?
Testi për SPAK
Hetimi i nisur nga SPAK dhe BKH është një ndër më kompleksët, pasi prek një sektor strategjik dhe shuma të mëdha parash publike. Pyetja është:
• A do të ndalet vetëm tek biznesmenë si Beqiri, apo do të hetohen edhe regjisorët e vërtetë që mund të qëndrojnë pas skemave të tenderëve?
• A do të shkojë Prokuroria e Posaçme deri në fund për të zbardhur lidhjet mes biznesit, tenderëve dhe politikës?