4 kullat prej kokaine në mes të Tiranës
SPAK ka zbuluar rrugën që bënin paratë e krimit nga kullat në Tiranë deri te vilat dhe resortet në bregdet, duke hapur një kapitull të ri në luftën kundër pastrimit të parave.
Në komunikimet e zbuluara në platformat Sky ECC dhe EncroChat nuk diskutohej vetëm për drogë, armë dhe larje hesapesh, por edhe për ndërmjetësime, ndikim dhe, mbi të gjitha, për mënyrën se si mund të pastroheshin fitimet nga krimi.
Katër çështje të Prokurorisë së Posaçme, të shqyrtuara, tregojnë se si kapitali i dyshuar kriminal ligjërohej përmes kontratave noteriale, të drejtave mbi prona, apartamente, vila, kompani dhe projekte ndërtimi.
Në qendër të hetimeve janë të paktën dy grupe të lidhura me Luçiano Koçekun dhe Artur Shehun, të dyshuar nga SPAK për përfshirje edhe në trafik ndërkombëtar droge. Të dhënat tregojnë se ata, në bashkëpunim me persona të tjerë, kryenin veprime mbi prona në Tiranë dhe në bregdet.
Por dosjet e reja të SPAK-ut japin një dimension tjetër. Ato forcojnë dyshimet se pikërisht ky model zhvillimi mund të ketë krijuar kushte të favorshme për integrimin e parave të krimit në tregun e pasurive të paluajtshme.
Larg Shqipërisë, sikurse dëshmojnë hetimet, të dyshuarit kryesorë organizonin takime në Spanjë, Monako, Gjermani, Turqi dhe ishujt e Karaibeve, ku, sipas prokurorëve, diskutohej futja e sasive të mëdha të drogës në Evropë.
VKM në shërbim të çunave të kokainës! Projekt kullash te Garda
Në të njëjtën panoramë dalin emra që më pas shfaqen edhe në transaksione pronash dhe investimesh ndërtimi, si Adrian Rama, Elton Memeti, Erjon Rama, Leonard Bishaj, Alfredo Hamzai dhe të tjerë.
Në këtë kontekst, SPAK ka përmendur disa projekte të dyshimta në Tiranë, si “Garden Building”, “Golden Tower Residence”, “Colonnade” dhe ish-aneksin e stadiumit “Qemal Stafa”. Paralelisht, i njëjti dyshim shfaqet edhe për projekte në Palasë, Nartë e më tej.
Për këtë janë bllokuar shuma monetare që, të konvertuara, arrijnë në rreth 140 milionë euro. Krahas tyre, në sekuestro janë përfshirë rreth 50 apartamente ose njësi banimi, 18 vila, 30 automjete, dhjetëra garazhe dhe një sipërfaqe toke që, nëse përfshihen edhe transaksionet e mëdha në jug, shkon në mbi 2.5 milionë m² (250 hektarë).
Sigurisht, këto janë masa sekuestroje preventive, jo vendime fajësie apo konfiskime përfundimtare. Megjithatë, ato tregojnë shkallën e pasurive që SPAK i konsideron të lidhura me prapavijë kriminale.
