Vjedhja e klientëve te UBA Bank dyshohet se shkon përtej degës, hetuesit verifikojnë rolin e drejtuesve
Hetimet për skandalin e vjedhjes së parave nga llogaritë e klientëve të UBA Bank nuk po fokusohen vetëm te punonjësit e degës ku u zbulua skema, por edhe te mundësia që drejtues të tjerë të niveleve më të larta të kenë pasur dijeni për veprimtarinë e paligjshme ose të kenë dështuar të evidentojnë shkeljet e përsëritura.
Burime pranë grupit hetimor bëjnë me dije se po analizohen procedurat e kontrollit të brendshëm, mekanizmat e auditimit dhe zinxhiri i autorizimeve, për të kuptuar nëse veprimet e dyshuara kriminale mund të jenë kryer për një periudhë të gjatë kohore pa u konstatuar nga strukturat mbikëqyrëse të bankës.
Dyshimet janë ngritur për shkak të numrit të lartë të transaksioneve të dyshuara, të cilat sipas hetimeve paraprake përfshijnë 30 tërheqje pa mandat, ndërhyrje në sistemin bankar, si dhe hapje e mbyllje depozitash pa autorizimin e klientëve.
Skema u zbulua pas denoncimit të një qytetari për zhdukjen e 500 mijë lekëve nga llogaria e tij bankare, si dhe pas kallëzimit të kryer nga vetë UBA Bank. Hetimet e mëvonshme zbuluan një aktivitet të dyshuar të organizuar, ku sipas prokurorisë ishin të përfshirë punonjës me funksione të ndryshme brenda institucionit.
Me kërkesë të Prokurorisë së Tiranës, gjykata ka caktuar 12 masa sigurie, mes tyre “Arrest në burg”, “Arrest në shtëpi” dhe “Pezullim nga detyra”, për punonjës të bankës të dyshuar për veprat penale “Vjedhja duke shpërdoruar detyrën”, “Falsifikimi i dokumenteve” dhe “Falsifikimi kompjuterik”.
Mes personave të arrestuar janë drejtori i degës, Albin Keta, dhe zëvendësdrejtori Gilbert Hoxha. Sipas prokurorisë, ata dyshohet se kanë shfrytëzuar aksesin në sistemin bankar për të përvetësuar shuma monetare nga llogaritë e klientëve nëpërmjet mandateve të rreme të tërheqjes, konvertimeve valutore të kundërligjshme, si dhe hapjes dhe mbylljes së depozitave pa autorizim.
Sipas dosjes hetimore, veprimet e dyshuara janë realizuar në bashkëpunim me arkëtarë, punonjës të shërbimit ndaj klientit dhe persona me funksione mbikëqyrëse brenda degës.
Prokuroria vlerëson se skema funksiononte në mënyrë të organizuar, ku ndërhyrjet në llogaritë e klientëve kryheshin nga punonjësit që kishin akses të drejtpërdrejtë në sistem, ndërsa verifikimet dhe autorizimet kalonin në nivelet drejtuese të strukturës bankare.
Pikërisht ky mekanizëm ka shtyrë hetuesit të verifikojnë nëse persona të tjerë me funksione drejtuese jashtë degës së përfshirë kanë pasur dijeni për shkeljet, kanë neglizhuar detyrimet e kontrollit ose mund të kenë luajtur rol në funksionimin e skemës.
Deri në këtë fazë, nuk ka persona të tjerë të marrë të pandehur përtej atyre ndaj të cilëve janë caktuar masat e sigurisë, ndërsa hetimet për identifikimin e përgjegjësive të mundshme në nivele të tjera të administrimit të bankës vijojnë.