Telashe për policët dhunues, një grup prokurorësh thellon hetimin, identifikohen disa efektivë: Përgjegjësia personale.
Prokuroria e Tiranës vijon hetimet për zbardhjen e ngjarjeve të ndodhura gjatë protestës, duke administruar pamjet filmike dhe marrë në pyetje personat e dëmtuar. Hetimet po drejtohen nga një grup prokurorësh nën drejtimin e Ndini Tavanit.
Në kuadër të hetimeve, po shqyrtohen pamjet e kamerave të policisë, mediave dhe kamerave të sigurisë, me qëllim dokumentimin e plotë të incidenteve dhe përcaktimin e përgjegjësive.
Një prej rasteve në fokus është ai i 28-vjeçarit Erjon Vishulli, i cili mbeti i plagosur në sy gjatë protestës dhe u transportua në Spitalin e Traumës në Tiranë.
Për këtë rast, Prokuroria i ka dërguar një letërporosi autoriteteve italiane, pasi i riu pritet t’i nënshtrohet një ndërhyrjeje të dytë kirurgjikale në Itali. Pas nxjerrjes së trupit të huaj nga syri, ai do të sekuestrohet dhe do t’i nënshtrohet ekspertimit për të përcaktuar përbërjen dhe materialin e tij.
Paralelisht, organi i akuzës po verifikon edhe rastet e dyshuara të tejkalimit të forcës nga efektivët e policisë. Për disa prej tyre janë marrë masa pezullimi nga detyra. Prokuroria ka regjistruar hetim kryesisht, ndërsa ka administruar edhe referimet e dërguara nga Agjencia e Mbikëqyrjes Policore.
Ndërkohë, për dhunën e ushtruar ndaj punonjësve të policisë është regjistruar një procedim i veçantë penal. Personat e arrestuar në lidhje me këto ngjarje janë tashmë nën masa sigurie.
Hetimet vijojnë për të dokumentuar të gjitha episodet e protestës dhe për të përcaktuar përgjegjësitë ligjore të personave të përfshirë.
