Burime për InfoNews, bëjnë me dije, se parkimet dysh, jo të gjitha do të cilësohen si ‘’bllokim i qarkullimi’’.
Secili efektiv që do të konstatojë automjete të parkuara në mënyrë të parregullt në rrugë, përbri një makine të parkuar anë rrugës, do të vijojë me proceduart normale të kodit rrugor që parashikohet me gjoba.
Ndërkohë në rast se automjetet e parkuara dysh do të bëhen arsye për pengimin e mjeteve si zjarrfikëse, ambulancat, policinë, shërbime të tjera të institucioneve apo bllokimin total të qarkullimit, bllokimin total të rrugës për këmbësorë, apo situata të ngjashme, policia do ta referojë çështjen në prokurori sipas nenit 293 të Kodit Penal, i cili citon: “Pengimi i qarkullimit të mjeteve të transportit, vënia e pengesave dhe ndalimi me çdo mjet e mënyrë i qarkullimit të mjeteve të transportit automobilistik, hekurudhor, ujor e ajror, dënohet me gjobë ose me burgim gjer në tre vjet”.
Më pas do të jetë Prokuroria, që duke analizuar situatat, pamjet filmike, por edhe dëshmitë, do të vendosë nëse shoferi I referuar nga policia do të ndiqet apo jo penalisht sipas nenit 293 të Kodit Penal.
Ky fenomen i shëmtuar dhe i rrezikshëm do të zhbëhet, me çdo kusht – tha në një deklaratë drejtori i Përgjithshëm i Policisë së Shtetit Ilir Proda.
“Me të gjithë respektin për drejtuesit e automjeteve, qyteti është në radhë të parë i këmbësorëve dhe megjithë mirëkuptimin për vështirësitë e parkimit, rruga është për të qarkulluar, jo për të parkuar në mes të saj”, vijoi Proda.
Aktualisht, këta drejtues që i parkojnë keq makinat dhe bëhen shkak për bllokimin e rrugës ndëshkohen me gjobë nga 1 mijë deri në 3 mijë lekë ose me largimin e mjetit me karrotrec, por pavarësisht masave të shumta administrative të vendosura nga policia, shkelja sërish është përsëritur.
