Eglant Koçi dyshohet se u vra me plumb në kokë, familjarët identifikojnë trupin! Dërgohet për ekspertizë në morg
TIRANË- Eglant Koçi, i riu që u zhduk pa lënë asnjë gjurmë rreth 2 javë më parë, dyshohet se është vrarë me plumb në kokë. Trupi i pajetë u pikas nga dronët në një humnerë pranë Elbasanit dhe nga këqyrja paraprake është konstatuar një plagë tejshpuese në pjesën e pasme të kokës, e dyshuar se është shkaktuar nga arma e zjarrit. Trupi i 34-vjeçarit është dërguar në morg, ku do t’i nënshtrohet një ekspertize më të detajuar mjeko-ligjore.
Identifikimi i trupit të dekompozuar, i gjetur në fshatin Cerrujë, u bë nga familjarët e Eglant Koçit, pasi policia e lokalizoi atë me ndihmën e dronëve. Koçi rezultonte i zhdukur prej dy javësh, ndërsa për këtë ngjarje është shpallur në kërkim shoku i tij i ngushtë, Armand Shakaj.
Në zyrën e Armando Shakajt, policia pati gjetur gjurmë baruti dhe një shenjë në mur, e cila dyshohej të jetë e shkaktuar nga një predh plumbi.