Pronari i kompanive Soft & Solution dhe Horizon, Ermal Beqiri është paraqitur sot në mëngjes në ambientet e SPAK ku është marrë në pyetje nga agjentët e BKH.
Kjo është hera e parë që Beqiri, një ndër përfituesit më të mëdhenj të tenderëve të AKSHI në sektorin e teknologjisë së informacionit, paraqitet fizikisht në SPAK pasi BKH ushtroi një kontroll blic disa javë më parë në zyrat e tij në Tiranë duke marrë prej andej dokumentacion, i cili mund ta kompromentojë rëndë biznesmenin dhe të zbardhe skemën kriminale të shpërndarjes së tenderëve në fjalë.
SPAK ka nisur një hetim të gjerë në lidhje me tenderët e AKSHI-t duke përfshirë disa personazhe të rendësishëm që ndikojnë në këto tenderë dhe duket se më shumë se në rolin e regjisorit, Beqiri ka qenë sot në SPAK në rolin e aktorit.
Më herët, në SPAK është paraqitur edhe drejtuesja e AKSHI znj.Mirlinda Karçanaj, ndërsa nuk ka të dhëna të njohura ende nëse prania e saj dhe z.Beqiri në ambientet e Prokurorisë së Posaçme lidhet me një dosje të njëjtë apo të ndyrshme.
Vetëm gjatë 5 viteve të fundit kompania “Soft& Solution” ka përfituar rreth 23 milionë euro tenderë nga kontratat publike në sektorin e teknologjisë së informacionit duke garuar kokë me kokë me Gerond Meçen e ABS.
Pavarësisht zhvillimeve hetimore, “Soft & Solution” vazhdon të renditet mes përfituesve më të mëdhenj të kontratave publike në fushën e teknologjisë së informacionit.
Kjo kompani, së bashku me “Advanced Business Solution”, kanë dominuar tenderat e këtij sektori vitet e fundit, shpesh duke u përballur mes tyre në Komisionin e Prokurimit Publik (KPP) për ankimime mbi procedurat.
Konkurrenca mes këtyre kompanive është bërë e hapur, duke reflektuar një betejë të fortë për kontrollin e tregut të IT-së publike në vend.
Sipas të dhënave publike, tenderat e fituar nga “Soft & Solution” përfshijnë projekte të rëndësishme të digjitalizimit të shërbimeve publike, furnizime me infrastrukturë IT dhe mirëmbajtje të sistemeve të teknologjisë së informacionit në institucione shtetërore.
Vlera e kontratave të akorduara kompanisë në vitet e fundit arrin në miliona euro.
Hetimet e nisura nga BKH dhe SPAK pritet të hedhin dritë mbi mënyrën e zhvillimit të këtyre procedurave dhe nëse ka pasur shkelje ligjore apo marrëdhënie të parregullta mes operatorëve ekonomikë dhe autoriteteve kontraktore.
Suksesi i Ermal Beqirit me tenderët e AKSHI
Ermal Beqiri merr në kontroll kompaninë “Soft & Solution” në 2021, për të cilën ka pasur dyshime të mëhershme mediatike se e kontrollonte në hije, që kur ai ishte drejtor IT në Hipotekë dhe shoqëria fitonte tendera radhazi pranë atij institucionit.
Kompania “Soft & Solution” është krijuar në janar të vitit 2011, me objekt “Zhvillim, implementim dhe mirëmbajtje të sistemeve dhe programeve në fushën e teknologjisë së informacionit…etj,”.
Aksionerët themelues ishin Enida Puto e Vjollca Vasjari. Disa muaj më pas, në tetor të atij viti, aksionet e shoqërisë blihen nga Dritan Didi.
Ky i fundit qëndron vetëm pak muaj aksioner dhe, në mars 2012 e shet kompaninë ‘Soft & Solution” tek Arjola Koromani.
Në Korrik të vitit 2021, Koromani e shet kompaninë tek Ermal Beqiri për shumën 1 milionë lekë të reja. Pas këtij transaksioni, Arjola Koromani vijon të mbajë postin e administratores së shoqërisë.
Gjatë vitit 2024, Ermal Beqiri shton portofolin e tij të biznese me tre kompani të tjera.
Në Mars të këtij viti ai themelon shoqërinë “R&D Solution”, me objekt “Kërkim shkencor dhe teknologjik..etj,”. Administratore e shoqërisë është sërish Arjola Koromani, ish-pronarja e “Soft & Solution”.
Në Prill të vitit 2024, Ermal Beqiri blen 100 përqind të aksioneve të shoqërisë ‘IT Tirana”, për një shumë prej 144 mijë euro. Pas blerjes, emri i shoqërisë ndryshohet në “NSolution”.
Shoqëria “IT Tirana” është themeluar në vitin 2008, me objekt të aktivitetit “Shërbime në fushën e telekomunikacioneve, rrjeteve kompjuterike…”.
Beqiri e bleu shoqërinë nga ortakët e saj, shtetasit gjermanë Volker Valentin Koch, Jochen Mosthaf dhe Arben Qarkaxhija.
Dhe, në Maj 2024, Ermal Beqiri bën një tjetër “goditje” të rëndësishme, duke blerë për 380 mijë euro të gjithë aksionet e kompanisë “Horizon”.
Kjo shoqëri është themeluar në vitin 2005, me objekt “veprimtari në fushën informatike…”.
Beqiri e bleu kompaninë nga “Comscope Limited”, një shoqëri e regjistruar në zonën off-shore të Qipros dhe me përfaqësues Vasileios Stachos.
Pas kryerjes së këtij transaksioni, Stachos vijon të mbajë ende postin e administratorit të shoqërisë “Horizon”. /skyweb.al