Një ngjarje e rëndë ka ndodhur në qytetin e Vlorës, ku një kamerier 18-vjeçar është dhunuar nga një efektiv policie jashtë detyrës, si edhe një person tjetër. Ngjarja ka ndodhur mbrëmjen e djeshme, 26 korrik, në një hotel në Vlorë, ku kamerieri është dhunuar gjatë orarit të punës në prani të klientëve, vendas e të huaj.
Ish-shefi i qarkullimit të Vlorës, Ardian Isufi, aktualisht nënkomisar në Policinë Kufitare të Dibrës, dhe një person tjetër i njohur për blutë e Vlorës, Leart Bimo, kanë pretenduar se kamerieri i ka çuar një shishe ujë më tepër se çfarë ata kishin porositur. InfoNews ka siguruar edhe pamjet e momentit të dhunës. Kamerieri Ron Balaj dallohet teksa qëndron pranë banakut, ndërsa i pari shkon pranë tij Isufi, ku dallohet teksa flet me kamerierin dhe më pas e qëllon me shpullë në faqe. Më tej, afrohet Leart Bimo, i cili dallohet më i ashpër dhe e qëllon disa herë më shpulla.
Dhuna ka ndodhur në prani të klientëve që të tmerruar nga skena, janë larguar menjëherë duke lënë lokalin bosh. I riu ka bërë kallëzim në polici dhe është marrë në pyetje nga blutë e Vlorës, bashkë me punonjës të tjerë të hotelit e dëshmitarë. Vetë i riu tregon me lot në sy për edhe se si nisi sherri dhe momentin e dhunës.