Vritet Ferdinant Hoti në Itali

Itali, ekzekutohet 35-vjeçari shqiptar dhe hidhet në lumë, dyshime për konfliktet e drogës

Një 35-vjeçar shqiptar është vrarë me armë zjarri në Itali, ndërsa autorët dyshohet se janë përpjekur të zhdukin gjurmët e krimit duke futur trupin e tij në një automjet dhe duke e hedhur në lumë.

Viktima është identifikuar si Ferdinant Hoti, banues në Mirano, në provincën e Venecias. Trupi i tij u gjet mëngjesin e së martës, më 8 shtator, brenda një automjeti tip “Fiat Bravo”, të zi, i cili ishte zhytur në lumin Tergola, në San Giorgio delle Pertiche, në provincën e Padovës.

Sipas hetimeve, Hoti ndodhej në sediljet e pasme të automjetit, i futur në një qese të zezë dhe me duart e lidhura. Mbi trup ishin vendosur edhe goma, me qëllim që automjeti dhe trupi të rëndoheshin e të qëndronin nën ujë. Makina rezultoi pa targa.

U identifikua nga shenjat e gishtërinjve

Karabinierët e Njësisë Hetimore të Padovës arritën të identifikojnë viktimën përmes shenjave të gishtërinjve dhe elementeve të tjera të mbledhura gjatë hetimit.

Sipas autopsisë, shqiptari ishte qëlluar nga një distancë e afërt dhe kishte duart e lidhura në momentin e ekzekutimit. Mjeku ligjor Rafi El Mazloum ka përcaktuar gjithashtu se Hoti kishte vdekur përpara se trupi të përfundonte në ujë.

Hetuesit po punojnë për të rindërtuar orët dhe lëvizjet e fundit të 35-vjeçarit, si dhe takimet që ai mund të ketë pasur para vrasjes. Një nga pistat kryesore të hetimit lidhet me një konflikt të mundshëm për trafik droge dhe një larje hesapesh.

Pronari i makinës po merret në pyetje

Përmes numrit të shasisë, karabinierët kanë arritur të identifikojnë pronarin e “Fiat Bravo”-s. Bëhet fjalë për një person që banon në provincën e Venecias dhe që nuk kishte raportuar vjedhjen e automjetit.

Ai po merret në pyetje nga hetuesit për të sqaruar se kush e kishte në përdorim makinën dhe si përfundoi ajo në lumin Tergola me trupin e shqiptarit brenda.

Makina u pikas nga disa zejtarë

Automjeti u pikas në orët e para të mëngjesit nga disa zejtarë që po kalonin pranë rrethrrotullimit të Torre di Burri. “Fiat Bravo” ishte zhytur në ujë, ndërsa trupi i Hotit ndodhej në pjesën e pasme të automjetit.

Sipas skenarit që po shqyrtojnë hetuesit, pas vrasjes autorët i kanë hequr targat e makinës dhe më pas e kanë shtyrë atë në lumë, në përpjekje për të fshehur trupin dhe për të eliminuar gjurmët.

Pika ku automjeti është hedhur në ujë ka tërhequr vëmendjen e hetuesve. Zona ndodhet mes rrugëve dytësore dhe fushave bujqësore dhe nuk është e lehtë për t’u aksesuar nga persona që nuk e njohin territorin. Për këtë arsye, nuk përjashtohet mundësia që autorët ta kenë njohur mirë zonën ose ta kenë studiuar më herët vendin ku do të hidhnin makinën.

Niveli i lumit Tergola ishte gjithashtu i lartë për shkak të ujitjes së tokave bujqësore, çka mund t’u ketë krijuar autorëve kushtet për të tentuar të fshehin automjetin dhe trupin.

Kërkime për armën dhe targat

Karabinierët po analizojnë pamjet e kamerave të sigurisë në zonë, përfshirë kamerat e një punishteje zdrukthëtarie që ndodhet pranë vendit ku u gjet automjeti.

Paralelisht, kontrollet po vijojnë edhe në lumin Tergola. Portat që kontrollojnë nivelin e ujit janë hapur për të ulur sasinë e ujit dhe për të lehtësuar kërkimet.

Hetuesit po kërkojnë targat e hequra të automjetit, armën që mund të jetë përdorur në vrasje dhe çdo objekt tjetër që autorët mund të kenë hedhur në lumë.

Për momentin, hetimi vijon për të zbardhur motivin e saktë të ekzekutimit dhe për të identifikuar personat përgjegjës për vrasjen e 35-vjeçarit shqiptar.