Dosja e tenderave abuziv, Alban Eftimi i Atelier 4 dëshmon në SPAK
Alban Eftimi, përfaqësues i kompanisë “Atelier 4”, ka dëshmuar në Prokurorinë e Posaçme (SPAK) në kuadër të hetimeve ndaj ish-zv.kryeministres Belinda Balluku. Pas përfundimit të deklarimeve, Eftimi ka lënë ambientet e SPAK.
Dëshmia e tij lidhet me dosjen hetimore ndaj Ballukut, e cila po hetohet për dyshime për korrupsion dhe pastrim parash, ndërsa është marrë e pandehur për veprën penale të “shkeljes së barazisë së pjesëmarrësve në tendera”.Balluku është marrë e pandehur për veprën penale të “shkeljes së barazisë së pjesëmarrësve në tendera”, lidhur me procedurën e prokurimit për ndërtimin e tunelit të Llogarasë, në aksin Orikum-Himarë.
Paralelisht, hetimet ndaj saj janë shtrirë edhe në disa procedura të tjera prokurimi, përfshirë shtatë tendera që lidhen me ndërtimin e Unazës së Jashtme të Tiranës.
Bëhet fjalë për procedurat për “Plotësimin, rakordimin dhe vazhdimin e punimeve Sheshi Shqiponja-Lumi i Tiranës, Loti 1 dhe QMT”; “Ndërtimi i segmentit rrugor Sheshi Shqiponja-Bulevardi i Ri, Loti 2”; “Ndërtim i segmentit rrugor Sheshi Shqiponja-Bulevardi i Ri-Shkozë, Urat mbi lumin Tirana”; si dhe lotet 4, 5, 6 dhe 7 të Unazës së Jashtme të Tiranës.
Një tjetër linjë hetimi lidhet me një vilë në Dhërmi, me vlerë rreth 145 mijë euro. Më 4 qershor, SPAK njoftoi se Balluku ishte marrë nën hetim për dyshimet se pasuria ishte përfituar nga shoqëria “Eurocol” në këmbim të favorizimit të kompanisë në një procedurë tenderimi.
Sipas hetimit, pasuria dyshohet se është fshehur përmes një skeme të mundshme pastrimi parash, ku është përfshirë edhe ish-futbollisti Igli Tare.
Dalja e Alban Eftimit nga SPAK vjen në një moment kur hetimet për procedurat e prokurimit dhe pasuritë e lidhura me Ballukun vijojnë të jenë në fokus të Prokurorisë së Posaçme.
