Apeli lë në fuqi sekuestron ndaj pasurive të Orest Sotës
Gjykata e Posaçme e Apelit për Korrupsionin dhe Krimin e Organizuar ka lënë në fuqi sekuestron preventive të vendosur ndaj pasurive të biznesmenit Orest Sota.
Vendimi është marrë këtë të mërkurë nga gjyqtari Dhimitër Lara, në kuadër të procedimit penal nr. 287/1 të vitit 2021, që po hetohet nga SPAK.
Apeli miratoi urdhrin e sekuestros preventive të dhënë më 10 qershor 2026 nga Gjykata e Posaçme e Shkallës së Parë.
Në këtë mënyrë janë rrëzuar ankimet e paraqitura nga Orest Sota, familjarë të tij dhe disa shoqëri tregtare të përfshira në masën e sigurimit pasuror.
Gjykata vendosi gjithashtu të mos pranojë për shqyrtim ankimin e paraqitur nga Sota dhe një prej kompanive të përfshira në procedurë.
Pasuritë mbeten nën sekuestro preventive, që do të thotë se ato bllokohen gjatë hetimit dhe nuk mund të shiten apo transferohen.
Masa nuk përbën konfiskim përfundimtar, i cili mund të vendoset vetëm në një fazë tjetër të procesit gjyqësor.
Orest Sota është arrestuar në kuadër të një hetimi të SPAK për një rrjet të dyshuar të trafikut ndërkombëtar të narkotikëve dhe pastrimit të parave.
Ndaj tij janë ngritur dyshime për trafikim narkotikësh, pastrim të produkteve të veprës penale dhe pjesëmarrje në grup të strukturuar kriminal. Hetimi lidhet me trafikimin e sasive të mëdha të kokainës nga Amerika Latine drejt vendeve europiane.
Sipas SPAK, rrjeti dyshohet se organizonte furnizimin, transportin, magazinimin dhe shpërndarjen e drogës.
Një pjesë e të ardhurave të dyshuara kriminale besohet se është investuar në Shqipëri përmes pasurive dhe shoqërive tregtare. Në kuadër të operacionit janë sekuestruar vila, apartamente, toka, automjete, mjete lundruese, llogari bankare dhe kuota kompanish.
Megjithatë, lista e përgjithshme e aseteve të sekuestruara u përket disa personave të përfshirë në procedim dhe jo vetëm Orest Sotës. Sota ka kundërshtuar akuzat, ndërsa mbrojtja e tij ka pretenduar se nuk ekzistojnë prova që e lidhin me aktivitetin kriminal.
Ai konsiderohet i pafajshëm deri në dhënien e një vendimi gjyqësor të formës së prerë.
EMRAT/ Kush janë 20 peshkaqenët që gllabëruan prona dhe pastruan para krimi
Malli i pastër nga Ekuadori…/ Pazaret me projektet e kullave në Tiranë
Përgjimet ‘Aruba’! CEO i FIBANK pas gomones që fshehën trafikantët
