Një fluturim i kompanisë “Ryanair” u shndërrua në një makth 12-orësh, pasi moti i keq e detyroi avionin të ulej dy herë në vende të ndryshme.
Fluturimi RK8288 u nis nga Londra Stansted për në Tiranë në orën 16:00 më 3 qershor dhe pritej të mbërrinte në Shqipëri brenda tre orësh.
Në vend të kësaj, pasagjerët përjetuan devijime drejt Brindisit në Itali dhe Selanikut në Greqi, pasi stuhitë me bubullima e bënë të pamundur uljen e avionit në Aeroportin e Tiranës.
Avioni më në fund u ul në kryeqytetin shqiptar në orën 05:00 sipas orës lokale, afërsisht nëntë orë me vonesë.
Por gjatë ndalesës së dytë në Greqi, policia u thirr në bord për të rivendosur rendin, pasi pasagjerët e irrituar nisën të përballeshin me anëtarët e ekuipazhit.
Në avion ndodheshin grupe të zhurmshme meshkujsh që po udhëtonin për festa beqarie, si edhe të rinj që mbanin shishe vodke të blera në “duty free”, ndërsa po afrohej sezoni i festivaleve në Ballkan.
Sipas raportimeve, disa pasagjerë britanikë ishin dukshëm të dehur që para ngritjes së avionit.
Fillimisht, pasagjerëve nuk iu lejua të blinin ushqime apo pije ndërsa avioni qëndronte i bllokuar në pistë në Itali.
Kur më në fund rifilloi shitja e produkteve në bord, pothuajse gjithçka u shit menjëherë, përveç disa pakove me patatina.
Një pasagjer, i dehur rëndë, refuzoi të zbatonte udhëzimet e ekuipazhit dhe filloi të lëvizte lirshëm në kabinë.
Një stjuardesë u detyrua ta ndalonte fizikisht.
“Ajo fjalë për fjalë e kapi, e ngriti si një fëmijë dhe e shtyu përsëri në sediljen e tij… ishte çmenduri,” tha burimi.
Kur avioni mbërriti në Selanik, pasagjerët organizuan atë që burimi e përshkroi si një “rebelim” kundër kapitenit.
“Është frikacak! Piloti duhet të dalë jashtë dhe të përballet me ne si burrë!”, bërtiti një grup burrash të zemëruar në drejtim të kabinës së pilotit.
Rreth 12 pasagjerë deklaruan se nuk do të qëndronin më në bord dhe i thanë pilotit: Nuk ka asnjë mundësi të na mbani këtu.
Më pas, policia greke hipi në avion dhe besohet se i kërkoi ekuipazhit t’i lejonte pasagjerët e pakënaqur të zbrisnin.
“Njerëzit po bërtisnin drejt kabinës së pilotit, duke e quajtur frikacak dhe duke i kërkuar të dilte e të përballej me ta si burrë,” tha një pasagjer.
Burimi i tha gjithashtu gazetës se përpjekja e tij për të kërkuar kompensim u refuzua automatikisht sapo futi numrin e fluturimit.
“U refuzua automatikisht sapo vendosa numrin e fluturimit. Mora një email automatik ku thuhej: ‘Kërkesa juaj është refuzuar’,” tha ai.
Ai ka vendosur ta çojë çështjen më tej përmes AviationADR, duke kërkuar rimbursim.
Në korrespondencën e parë nga Daily Mail, Ryanair deklaroi se fluturimi “u ndërpre për shkak të rrethanave të papritura dhe të jashtëzakonshme, të cilat ishin jashtë kontrollit tonë.”
Një zëdhënës i Ryanair tha se devijimet ndodhën për shkak të kushteve të pafavorshme atmosferike në Aeroportin e Tiranës dhe të një stuhie të mëvonshme me bubullima.