Gabim i pilotëve të WizzAir, avioni shpëton mrekullisht
Një fluturim i Wizz Air me 168 persona në bord shmangu një katastrofë për vetëm dy sekonda, pasi pilotët bënë një gabim në futjen e të dhënave në kompjuterin e avionit gjatë procedurës së ngritjes.
Bëhet fjalë për fluturimin 5411, i cili u nis nga aeroporti i Lutonit në Britaninë e Madhe drejt Athinës në prill të vitit të kaluar.
Sipas raportit të publikuar nga Dega Britanike për Hetimin e Aksidenteve Ajrore (AAIB), pilotët nuk verifikuan nëse në kompjuterin e avionit ishin futur saktë llogaritjet e domosdoshme të ngritjes, të njohura si V-speeds, të cilat përcaktojnë shpejtësitë kritike që duhen arritur për një ngritje të sigurt.
Avioni u ngrit nga pista e Lutonit kur i kishin mbetur vetëm 162 metra deri në fund të saj.
Analiza e të dhënave të FlightRadar24, e cituar nga The Telegraph, tregon se avioni Boeing 737 Max po fluturonte me rreth 146 nyje, ose 168 milje në orë, menjëherë pasi u ngrit nga toka. Kjo do të thotë se ai u shkëput nga pista vetëm rreth dy sekonda përpara se të mbërrinte në fundin e saj.
Në momentin kur kaloi mbi fundin e pistës, avioni ndodhej në një lartësi prej vetëm 13 këmbësh (rreth 4 metrash), ndërkohë që standardet e sigurisë kërkojnë një lartësi minimale prej 35 këmbësh (rreth 11 metrash), për të garantuar kalimin e sigurt mbi pengesat.
Në bord ndodheshin 162 pasagjerë, katër anëtarë të ekuipazhit të kabinës dhe dy pilotë.
Pamjet e kamerave të sigurisë në aeroportin e Lutonit tregojnë se avioni ishte aq pranë tokës pas ngritjes, sa mezi dukej mbi avionët e parkuar dhe ndërtesat përreth.
Hetuesit e AAIB theksuan se, nëse gjatë ngritjes do të kishte ndodhur një humbje fuqie në motorë, ekzistonte rreziku që avioni të mos kishte mundur të ndalej në pjesën e mbetur të pistës ose të mos arrinte lartësinë minimale të nevojshme për një largim të sigurt.
Sipas raportit, ndryshimi i pikës së planifikuar të nisjes në pistë bëri që avioni të ngrihej me një konfigurim të gabuar të fuqisë së motorëve.
Kontrollorët e trafikut ajror i kishin ofruar ekuipazhit një hyrje më të afërt në pistë, duke bërë që ngritja të kryhej nga një pikë e ndërmjetme dhe jo nga fillimi i saj.
Wizz Air e bën sërish! Braktis dhjetëra shqiptarë në Trieste
Edhe pse pilotët besonin se kishin përditësuar në kompjuter parametrat e rinj të ngritjes për distancën më të shkurtër, hetimi arriti në përfundimin se këto të dhëna nuk ishin futur saktë.
Për pasojë, motorët punuan me fuqi më të ulët se sa kërkohej, gjë që solli një përshpejtim më të ngadaltë dhe një ngritje të vonuar të avionit.
AAIB bëri të ditur se operatori i fluturimit ka rishikuar procedurat dhe ka nxjerrë udhëzime të reja për ekuipazhet.
Kompanitë ajrore përdorin shpesh ngritje me fuqi të reduktuar për të kursyer karburant dhe për të ulur konsumimin e motorëve, kur gjatësia e pistës e lejon këtë.
Megjithatë, kur ngritja kryhet nga një pikë e ndërmjetme e pistës, fuqia e motorëve duhet të rritet për të kompensuar distancën më të shkurtër të disponueshme.
Pavarësisht incidentit, fluturimi u ul normalisht në Athinë dhe avioni kreu edhe tre fluturime të tjera gjatë së njëjtës ditë.
Fluturimi u krye nga kompania britanike Ascend Airways, në bazë të një marrëveshjeje të tipit “wet lease” (ACMI). Në këtë lloj kontrate, një kompani ajrore i vë në dispozicion një kompanie tjetër avionin, pilotët, ekuipazhin, mirëmbajtjen dhe sigurimin, ndërsa fluturimi kryhet me markën dhe numrin e kompanisë që shet biletat.
Në këtë rast, pasagjerët udhëtonin me një fluturim të Wizz Air, por avioni dhe ekuipazhi i përkisnin Ascend Airways.
Ascend Airways ka ndërprerë aktivitetin e saj gjatë këtij viti, duke lënë pas rreth 50 milionë dollarë borxhe ndaj kreditorëve.
Kompania britanike ofronte avionë dhe ekuipazhe për kompani të tjera ajrore që kishin nevojë për kapacitete shtesë gjatë periudhave të ngarkuara.
Në reagimin e saj, Wizz Air konfirmoi se fluturimi i përmendur në raportin e AAIB ishte operuar në kuadër të një marrëveshjeje charter të lidhur me Wizz Air UK.
“Siguria është dhe mbetet prioriteti më i lartë i Wizz Air. Pas incidentit, çështja u shqyrtua së bashku me kompaninë operuese.
Wizz Air merr në konsideratë publikimin e raportit të fundit të AAIB dhe mbetet e përkushtuar ndaj standardeve më të larta të sigurisë”, deklaroi kompania. /The Telegraph