Defekt në avionin e Ryanair, ulje emergjente në Selanik! Dëmtohet një dritare, plagoset një pasagjer
Momente paniku përjetuan pasagjerët e një fluturimi të kompanisë Ryanair nga Selaniku drejt Mynihut, pasi avioni u detyrua të kryente ulje emergjente vetëm pak minuta pas ngritjes.
Sipas informacioneve paraprake, avioni ishte ngjitur në një lartësi prej rreth 6.000–6.500 këmbësh kur u shfaq një problem teknik në njërin prej dy motorëve. Ekuipazhi aktivizoi menjëherë procedurat e emergjencës dhe piloti vendosi të kthehej në aeroportin “Maqedonia” të Selanikut, ku avioni u ul në mënyrë të sigurt.
Gjatë fluturimit, pasagjerët raportuan se dëgjuan një zhurmë të fortë dhe se një nga dritaret e avionit u dëmtua, duke shkaktuar dekompresion të kabinës. Si pasojë, maskat e oksigjenit u aktivizuan automatikisht, ndërsa pasagjerët ndihmuan personin që ndodhej ulur pranë dritares së dëmtuar.
Pas uljes, ekipet e ndihmës së shpejtë transportuan në spital një pasagjer serb, 61 vjeç, i cili kishte pësuar dëmtime në qafë. Ai u dërgua në spitalin AXEPA të Selanikut për trajtim mjekësor.
Pasagjerët vijuan më pas udhëtimin drejt Mynihut me një avion tjetër, ndërsa autoritetet greke dhe kompania Ryanair kanë nisur hetimet për të zbardhur shkaqet e incidentit.