Si ndodhi atentati në Laç? Ilir Gjini u qëllua me 7 plumba! Artur Suti në kërkim
**Detaje të reja nga ekzekutimi në Laç, identifikohet autori i dyshuar**
Detaje të reja kanë dalë në dritë nga vrasja e ndodhur mbrëmjen e së enjtes në lagjen “Erdogan” në Laç, ku humbi jetën Ilir Gjini, rreth 40 vjeç.
Sipas burimeve hetimore, viktima, i njohur edhe me mbiemrat Kokaj, Lika dhe Nure, është qëlluar me shtatë plumba në pjesë të ndryshme të trupit. Policia ka identifikuar si autor të dyshuar Emiljan Suti, i njohur edhe me emrin Artur Suti, i cili është shpallur në kërkim.
Si u vra Ilir Lika në Laç, policia: Pas debatit kërciti arma
Nga të dhënat paraprake rezulton se sulmi ndodhi pak pasi Gjini kishte parkuar automjetin e tij tip “Benz” dhe po i drejtohej hyrjes së pallatit ku banonte. Edhe pse tentoi të largohej, ai u ndoq nga autori dhe u qëllua sërish pranë hyrjes së godinës. Viktima ndërroi jetë gjatë transportimit drejt spitalit.
Hetimet kanë zbuluar se viktima dhe autori i dyshuar banonin në të njëjtën lagje. Gjini ishte me origjinë nga Miloti dhe jetonte prej vitesh në Laç, ndërsa e kaluara e tij po verifikohet nga grupi hetimor. Një nga pistat që po shqyrtohet lidhet me aktivitetin e tij jashtë Shqipërisë.
Ndërkohë, Emiljan (Artur) Suti rezulton person me precedentë penalë. Ai është dënuar më parë me pesë vite burg për veprën penale “kanosje për shkak të detyrës”, si dhe ka qenë i proceduar për armëmbajtje pa leje. Gjithashtu, ai rezulton të jetë arrestuar në Belgjikë për vjedhje dhe në vitin 2011 i ka shpëtuar një atentati pranë Komisariatit të Policisë në Kurbin.
EMRI/ Të shtëna me armë zjarri në Laç, raportohet për një të vrarë
Artur Suti është vëllai i Gentian Sutit, një emër i njohur për autoritetet, i arrestuar më parë për vepra të ndryshme penale. Në vitin 2019, dy vëllezërit Suti dhe një kushëri i tyre u përfshinë në një ngjarje të rëndë ku mbetën të vrarë kushërinjtë Mikel dhe Jani Jushi, ndërsa Gentian Suti u plagos.
Po ashtu, në vitin 2010, vëllezërit Suti u arrestuan pas një përplasjeje me Policinë e Shtetit, ku u akuzuan fillimisht për tentativë vrasjeje ndaj efektivëve, armëmbajtje pa leje, kanosje dhe mosbindje ndaj urdhrit të policisë. Megjithatë, gjykata rrëzoi akuzën për tentativë vrasjeje dhe i dënoi për veprat penale të kanosjes, mosbindjes ndaj policisë dhe armëmbajtjes pa leje. Artur Suti u dënua përfundimisht me pesë vite burg, ndërsa Gentian Suti me katër vite.
Grupi hetimor vijon punën për zbardhjen e plotë të rrethanave të ngjarjes, dokumentimin e motivit dhe kapjen e autorit të dyshuar.
