Detaje të reja janë zbuluar nga dosja hetimore e SPAK, lidhur me një rast të trafikut të lëndëve narkotike, ku u godit një grup shqiptarësh disa javë më parë. Sipas dosjes, në bisedat e zhvilluara në Sky ECC, trafikantët përdornin makina luksoze si formë shkëmbimi për kokainën. Në një prej komunikimeve rezulton se bëhet fjalë për një Mercedes G-Class AMG 6.3, një automjet me vlerë tregu rreth 230 mijë euro. Sipas bisedës, makina shkëmbehej me lëndë narkotike me një vlerë të përllogaritur prej 190 mijë eurosh.
Më poshtë është një pjesë e bisedës së zhvilluar më 17 prill 2020 mes Alfredo Hamzait dhe një personi tjetër të arrestuar në kuadër të hetimit:
Personi 1: “I the që do blej guroren? Vetëm a i ke thënë që i hodhe lekët aty?”
Personi 2: “Pa merak, gati i kam për dy G-Class.”
Personi 1: “Po, po vlla, nuk diskutohet.”
Personi 2: “Lekët te gurorja. Vihet puna para, vlla. Aty janë makinat G-Class, çfarë të duash ti, me çmime dhe interesa shumë të mira. Edhe pas një viti, po ta shesësh prapë, i nxjerr lekët e tua.”
Personi 1: “Nesër i them njeriut tim të më dërgojë foto nga Luksemburgu. Kam folur me të. E di që janë G-Class, me të gjitha opsionet.”
Personi 2: “Kjo, me ndërrim, shkon 190 mijë, ndërsa në dyqan janë nga 225 deri në 300 mijë euro.”
Personi 1: “Është me targa zvicerane.”
Personi 2: “Me çfarë do e ndërroni?”
Personi 1: “Po me mall.”
Personi 2: “Ka vetëm 15 mijë kilometra, është super full opsion dhe ngjyrë të zezë.”
