Sherri mes Brian Syzo dhe Nikola Agollit! Si ndodhi plagosja në Pogradec
Plagosje me armë në Pogradec, 35-vjeçari dërgohet me helikopter në Tiranë; dyshohet për hakmarrje
Një 35-vjeçar mbeti i plagosur me armë zjarri mesditën e kësaj të hëne në qytetin e Pogradecit.
Sipas burimeve paraprake, Nikola Agolli dyshohet se ka qëlluar me pistoletë në këmbë Brian Syzon, i cili u transportua fillimisht për ndihmë mjekësore dhe më pas me helikopter drejt Spitalit të Traumës në Tiranë. Burime nga grupi hetimor bëjnë me dije se plumbi i ka dëmtuar një prej venave kryesore të këmbës, ndërsa ai ndodhet nën kujdesin e mjekëve.
Hetimet paraprake tregojnë se ngjarja dyshohet të ketë motive hakmarrjeje. Sipas të njëjtave burime, vëllai i të plagosurit, Adni Syzo, kishte plagosur Nikola Agollin në një berberhane në tetor të vitit të kaluar.
Policia ka shoqëruar një person që dyshohet se ka qenë në shoqërinë e autorit në momentin e ngjarjes, ndërsa vijojnë kërkimet për kapjen e Nikola Agollit dhe personave të tjerë që dyshohet se e ndihmuan të largohej nga vendi i ngjarjes.
Sipas hetuesve, autorët kanë braktisur automjetin në zonën e Qafë-Thanës dhe më pas janë larguar me një furgon.
Nga verifikimet rezulton se Brian Syzo ishte ekstraduar nga Gjermania në gusht të vitit të kaluar, pasi ndaj tij ishte caktuar masa e sigurisë “arrest në burg” për veprën penale të shpërndarjes së lëndëve narkotike. Deri më tani nuk është bërë e qartë se në çfarë rrethanash ai kishte rifituar lirinë.