Përgjimet për grupin Koçeku! Sekuestrohen 128 mln € në llogarinë e noteres Amela Mukaj
Prokuroria e Posaçme (SPAK) ka goditur një grup të strukturuar kriminal të dyshuar për trafik të lëndëve narkotike dhe pastrim parash, ndërsa në kuadër të hetimeve janë sekuestruar mbi 128 milionë euro të lidhura me transaksione të shitblerjes së tokave në Zvërnec.
Sipas burimeve hetimore, përgjimet e realizuara nga SPAK në kuadër të hetimit ndaj grupit kriminal të vëllezërve Koçeku kanë nxjerrë në pah elemente që çuan në hapjen e një hetimi të veçantë për transaksionet e pronave në zonën e Zvërnecit.
Me vendim të gjykatës të datës 10 qershor, është vendosur sekuestro preventive mbi shumën totale prej më shumë se 128 milionë eurosh, të depozituara në llogarinë bankare të noteres Amela Mukaj, të cilat lidhen me tre kontrata shitblerjeje të nënshkruara më 24 prill 2026.
Shuma më e madhe e sekuestruar, 110.247.134 euro, i referohet një kontrate shitjeje mes biznesmenit Artur Shehu dhe kompanisë Albanian Land Development.
Po ashtu, janë sekuestruar edhe 10.044.684 euro dhe 8.062.619 euro të tjera, të lidhura me dy kontrata të veçanta shitblerjeje mes Ferdinand Sulaj, Burbuqe Sulaj dhe kompanisë Albanian Land Development.
Hetimet vijojnë për të verifikuar burimin e fondeve dhe lidhjet e mundshme të këtyre transaksioneve me aktivitetin kriminal të grupit nën hetim. Sipas të dhënave paraprake, një pjesë e konsiderueshme e pronave në zonën e Zvërnec rezulton e lidhur me biznesmenin Artur Shehu.
