Një episod dhune në burgun e Vlorës është shënuar mbrëmjen e kësaj të premteje. Pesë persona kanë dhunuar një tjetër të arrestuar, biznesmenin Eduard Alikajn.
Sipas burimeve, ngjarja ka nisur si një konflikt verbal. Më pas, ajo ka degraduar në dhunë fizike. Eduard Alikaj ndodhet ende në paraburgimin e Vlorës. Ndërkohë, pesë personat e përfshirë në konflikt pritet të transferohen.
Alikaj është në burgun e Vlorës, në pritje të ekstradimit drejt Italisë. Ai u arrestua në vitin 2023 për vjedhje me dhunë të 10 mjeteve motorike në Itali veriore.
Gjatë kontrollit në ambientet që këta shtetas përdornin, u gjetën dhe u sekuestruan disa mjete. Në fshatin Babicë, u gjet një ekskavator i dyshuar i vjedhur. Po ashtu, brenda një kamioni u gjet një mjet lundrues gomone me gjatësi rreth 13 metra, si dhe 3 motorë që dyshohet se mund të përdoren për ngjarje kriminale.
