Durim Bami kalon në gjykim…Aldo Avdyli tentoi ta vriste
Gjykata e Posaçme kalon në gjykim dosjen për 7 të arrestuarit e operacionit ‘Revanshi’, nga 27 të pandehurit pas goditjes së 7 grupeve kriminale. 20 të tjerë vijojnë të jenë në kërkim. Në gjykim, Durim Bami, Aldo Avdyli, Marklen Haka, Altin Morina, Jozi Kraja, Henerigert Mitri dhe Edson Jozwik, në akuzë për disa krime si vrasje, tentativë vrasje, trafik dhe kultivim droge.
I njohur si i forti i Niklës, Durim Bami, i arrestuar në Dubai në tetor 2024 dhe i ekstraduar pak ditë më parë, akuzohet për “sigurim e kushteve në vitin 2021 për vrasjen e Arben Ndokës, Tori Xheçukës dhe Erigers Mihasit, drejtues dhe financues i grupit të kultivimit të kanabisit në Nikël të Fushë Krujë dhe Bubq të Krujës në dhjetor 2019-korrik 2020.
Altin Morina, ish-efektiv i RENEA-s, akuzohet si bashkëpunëtor i Durim Bamit në kultivimin e drogës në zonën e Krujës dhe për dhënien e informacioneve mbi operacionet e policisë që Bami të shmangte kontrollet për parcelat me drogë.
Jozi Kraja i ekstraduar nga Zvicra dhe Aldo Avdylaj, si anëtarë të grupit kriminal të Ervis Martinajt, bosit të zhdukur të lojërave të fatit, akuzohen për sigurimin e kushteve për vrasjen e mbetur në tentativë të vëllezërve Durim dhe Valter Bami, e porositur nga Arben Ndoka, ku u angazhua edhe Ervis Martinaj. Aldo Avdylaj akuzohet se ka drejtuar grupin me Astrit Avdylaj për vrasjen e Edmir Bregut në vitin 2021 në Durrës.
Mariklen Haka, i arrestuar në shtator 2024 akuzohet në këtë dosje si pjesëmarrës për atentatin e dështuar ndaj Durim Bamit. Haka ishte aleat dhe armik i disa grupeve kriminale, i dyshuar po ashtu për vrasjen e Gentjan Bejtjas në Fushë-Krujë e disa ngjarje të tjera.
Henerigert Mitri, ish-drejtues i policisë së Lezhës, akuzohet për favorizimin e kultivimit të drogës nga një grup kriminal i identifikuar nga SPAK në maj-shtator 2020 në Lezhë dhe Krujë. Mitri dyshohet se ka dhënë informacion për operacionet e policisë për të shmangur kontrollet. Ai u jepte informacion grupeve kriminale përmes SkyEcc. Lejonte edhe aktivitetin e paligjshëm të lojërave të fatit.
Në gjykim dhe Edson Jozwik, i njohur edhe si Edson Pjetri, alias Edmir Pjetri, në akuzë për trafikim ndërkombëtar droge drejt vendeve të BE dhe grup të strukturuar kriminal.
Bami, Avdyli, Haka dhe Kraja ndodhen në burgun 313. Prokuroria e Posaçme në dosjen “Revanshi” zbardhi 12 ngjarje kriminale që ndodhën, u përgatitën apo që dështuan gjatë vitit 2020 nga 7 grupe kriminale me veprimtari në qytete si Lezha, Durrësi, Kruja, Tirana, Vlora dhe Burreli. Në total, SPAK lëshoi 50 urdhër arreste dhe pothuajse gjysma e tyre u ekzekutuan brenda dhe jashtë vendit ndërsa disa të tjerë ishin të arrestuar për akuza të tjera.