Në bursë nafta bie, në Shqipëri rritet! A po abuzohet me çmimet? Vëzhgimi tek Gega Oil, ESP Oil, Alpet, Elda…
Çmimet e naftës në tregjet ndërkombëtare kanë rënë ndjeshëm, duke zbritur në rreth 90 dollarë për fuçi, pasi deklaratat e presidentit amerikan Donald Trump se lufta kundër Iran është “pothuajse e përfunduar” kanë qetësuar pjesërisht tregjet globale të energjisë.
Sipas raportimit të agjencisë Reuters, kontratat e naftës kishin kaluar më herët 100 dollarë për fuçi dhe madje kishin arritur deri pranë 120 dollarëve, niveli më i lartë që nga viti 2022, për shkak të frikës për ndërprerje të furnizimit nga Lindja e Mesme. Megjithatë, çmimet ranë me shpejtësi pasi Trump deklaroi në një intervistë për CBS News se operacionet ushtarake kundër Iranit janë “shumë të avancuara dhe pothuajse të përfunduara”. “Mendoj se lufta është shumë e përfunduar, pothuajse. Ata nuk kanë më marinë, nuk kanë komunikime dhe nuk kanë forcë ajrore,” u shpreh ai.
Por pavarësisht kësaj, në disa pika të pakicës në Tiranë cmimi u rrit dhe përgjatë autostradës çmimi i naftës u rrit me 16 lekë për litër, nga 182 lekë për litër që ishte ditën e premte më 6 Mars. Sot çmimi i shitjes së naftës ka rritur në nivelin prej 198 lekë për litër.
Nga vëzhgimi i “Monitor” në autostradë rritja është reflektuar në pikat e karburantit të disa kompanive, si: “Alpet”, “Gega” ku rezulton se çmimi i naftës ka arritur 198 lekë për litër, ndërsa benzina po tregtohet me 188 lekë për litër.
Rritje është reflektuar edhe në disa pika brenda Tiranës.
Në pikën e pakicës së kompanisë Kastrati pranë zonës së Xhamllikut nafta po tregtohet 198 lekë për litër nga 182 lekë për litër që u shit ditën e premte.
Po ashtu edhe në disa pika të kompanisë “Elda” çmimi i naftës ka arritur 198 lekë për litër nga 189 lekë që u tregtua ditën e djeshme. Rritja për këtë kompani ëhstë edhe me 9 lekë të tjera.
Shoqata e Hidrokarburave thotë se tregu i pakicës ka reflektuar ndryshimet e çmimeve në bursa pas ditës së premte.
Në bursat e huaja ditën e premte çmimi i naftës arriti 88.9 USD për fuçi.
Të dielën në darkë çmimet arritën në nivelin e 103 USD për fuçi dhe mëngjesin e të hënës çmimi arriti në 103 USD për fuçi.
Ndërkohë ditën e djeshme në darkë pas deklaratës së presidentit Donald Trump për ndërprerje të sulmeve në bursat e huaja çmimi i naftës zbriti në 90 USD për fuçi. Para nisjes së sulmeve në Lindjen e Mesme, nafta në bursë tregtohej me çmim 65 USD për fuçi.
Në vend, rritja e çmimit të naftës në tregun e pakicës nisi prej 4 Marsit fillimisht me 4 lekë për litër. Nga 175 lekë çmimi arriti në 179 lekë për litër. Çmimi prej 175 lekë për litër kishte mbetur i pandryshuar prej muajit tetor 2024.
Me tej më 6 Mars çmimi u rrit sërish me 3 lekë duke arritur në 182 lekë për litër.
