Nga Merin Maçi
Ky është momenti kur G.B. largohet së bashku me bashkëshorten e tij nga zona e ish-Parkut në kryeqytet, pasi goditi tri herë me thikë 31-vjeçarin Egli Pashollari, i cili ndërroi jetë më pas në spital. Foto ekskluzive e siguruar nga gazetari Merin Maçi është fiksuar nga kamerat e sigurisë në zonën ku ndodhi ngjarja, ku shihet 40-vjeçari teksa ecën me gruan e tij qetësisht.
Burime pranë grupit të hetimit bëjnë me dije se vrasësi kishte mbërritur në zonë rreth orës 15:30 për të marrë bashkëshorten e tij, e cila punonte në një market fare pranë vendit të ngjarjes. Sapo e reja ka hipur në makinë, autori ka parë në distancë të riun Egli Pashollari të shoqëruar me një shok të tij.
Viktima nuk ishte i panjohur për 40-vjeçarin G.B., pasi më herët bashkëshortja e tij i ishte ankuar se i riu e kishte ngacmuar. Në këto kushte, ai ka dalë nga makina dhe është drejtuar për te 31-vjeçari, duke e goditur me thikë një herë në qafë dhe më pas dy herë në trup.
Pasi ka lënë të plagosur të riun, ai ka marrë sërish makinën dhe e ka braktisur pak metra larg zonës ku ndodhi ngjarja, ndërsa së bashku me bashkëshorten e tij janë larguar me taksi. Policia ka mundur të gjejë dhe sekuestrojë automjetin tip Audi, me të cilin autori erdhi në vendngjarje, si dhe ka marrë në pyetje bashkëshorten e tij, teksa vijon kërkimet për G.B.
E reja, përpara oficerëve të policisë, ka rrëfyer se viktima e ngacmonte shpesh, për shkak se ajo punonte në një market në lagjen e tij, shqetësim të cilin ia kishte përcjellë edhe bashkëshortit të saj.
Nuk i linte rehat gruan…ky është tropojani që vrau të riun te Parku