Evazion miliona lekë, Prokuroria e Tiranës nis hetim ndaj postave private. Express 24 dhe Elite Posta u kontrolluan me pare.
Prokuroria e Tiranës ka ndërmarrë një aksion kontrollesh në disa subjekte që ofrojnë shërbime postare në kryeqytet, në kuadër të një hetimi të gjerë për evazion fiskal. Operacioni është zhvilluar pas verifikimeve të kryera nga organi i akuzës, të cilat kanë nxjerrë në pah dyshime serioze për shkelje të ligjit në aktivitetin e këtyre subjekteve.
Sipas njoftimit zyrtar të Prokurorisë, gjatë kontrolleve janë sekuestruar rreth 13 milionë lekë, si edhe sasi të konsiderueshme mallrash të marra në dorëzim pa fatura tatimore. Gjithashtu, janë bllokuar dokumente shoqëruese dhe materiale të tjera që, sipas hetuesve, përbëjnë prova të qarta të paligjshmërisë në drejtim të evazionit fiskal.
“Deri më tani, nga kontrollet janë sekuestruar mallra të marra në dorëzim pa fatura tatimore, shuma parash në vlerën e 13 milionë lekëve, si dhe dokumentacion që tregon dyshime të bazuara për aktivitet të kundërligjshëm dhe evazion fiskal. Po ashtu, janë sekuestruar shuma parash që dyshohet se rrjedhin nga veprimtari e paligjshme”, thuhet në deklaratën e Prokurorisë pranë Gjykatës së Shkallës së Parë të Juridiksionit të Përgjithshëm, Tiranë.
Autoritetet bëjnë me dije se hetimet janë ende në vijim, me fokus identifikimin e shitësve realë që qëndrojnë pas këtyre dërgesave, si dhe dokumentimin e plotë të zinxhirit të veprimtarisë së dyshuar kriminale. Prokuroria pritet të hedhë dritë mbi mënyrën se si është shmangur detyrimi fiskal dhe nëse kemi të bëjmë me një skemë të organizuar.
Kujtojmë se mbrëmjen e djeshme redaksia e JOQ Albania raportoi bastisjen e zyrave të Express 24 dhe Elite Posta nga policia.