Linda Pustina është shkarkuar nga posti i drejtoreshës së Agjencisë Kombëtare për Kontrollin e Kanabisit.
Skyweb.al mëson se në vend të saj është emëruar Anila Alliu, ndërsa shkaqet zyrtare të largimit nuk janë bërë ende të ditura.
Lëvizja vjen në një moment të ndjeshëm, kur qeveria ka hapur projektet për kultivimin e kanabisit për qëllime mjekësore dhe po përgatit kornizën e re ligjore për këtë sektor.
Ndërkohë, prej muajsh Pustina ka qenë e përfshirë në një konflikt me fqinjët e saj, të cilët janë ankuar në institucione se në tarracën e banesës kishte mbjellë pemë dhe shkurre që, sipas tyre, kanë dëmtuar solenin dhe kanë shkaktuar futje uji në apartamentet poshtë. Fqinjët kanë depozituar ankesa në prokurori dhe në Inspektoratin e Mbrojtjes së Territorit, por pa rezultat konkret.
Nuk ka ende një konfirmim nëse shkarkimi ka lidhje me këtë çështje private, por situata ka shkaktuar zhurmë në disa nga zyrat më të rëndësishme të administratës shtetërore, duke e bërë lëvizjen edhe më të komentuar. /skyweb.al