Drejtori i Përgjithshëm i Policisë së Shtetit, Ilir Proda, raportoi të hënën në Komisionin për Çështjet e Brendshme dhe të Mbrojtjes, ku u pyet lidhur me atentatin e rëndë të ndodhur pesë ditë më parë në Rinas.
Deputeti i Partisë Demokratike, Klevis Balliu, akuzoi drejtuesin e policisë se e ka kthyer institucionin në “vegël të krimit dhe mburojë të bandave”, duke iu referuar implikimit të një efektivi në atentat dhe duke nënvizuar se “në aeroport nuk gjendej polic as me satelitin 1 dhe 2”.
Sipas Balliut, mënyra si autorët ekzekutuan, u larguan, dogjën makinën dhe zhdukën gjurmët brenda një ore e gjysmë, tregon “degradim të plotë të rendit publik”.
Proda kundërshtoi akuzat, duke theksuar se përgjegjësia penale është individuale dhe nuk mund të përfshihet e gjithë policia për veprimet e disa punonjësve të inkriminuar.
Ai kujtoi se Policia e Shtetit “i ka dhënë vendit 227 dëshmorë” dhe nuk meriton përbaltje.
“Policia e Shtetit është një organizatë që i ka dhënë 227 dëshmorë atdheut. Mos përbaltni Policinë e Shtetit, përgjegjësia penale është individuale dhe cilido punonjës që ka rezultuar i përfshirë në këto ngjarje… Përfshirja e disa individëve nga polica e shtetit nuk bëjnë pis një organizatë që i ka dhënë atdheut 227 dëshmorë…”, u shpreh kryepolici.
Lidhur me ngjarjen në Rinas, kreu i policisë tha se ajo “ka vend për analizë” dhe se hetimet janë në vijim.
“Çështja është nën hetim, nuk mund të them më shumë”, përfundoi Proda.