Do të duhej zhurma e madhe me rrethimin policor dhe ushtarak dhe marrjen e godinës së Televizionit News 24 në 9 Gusht të këtij viti, që shqiptarët të mësonin për ekzistencën e një kompanie të re shtetërore me emrin “KAYO”.
Administratori i saj Ardi Veliu dhe më pas kryeministri Edi Rama, deklaruan se bëhej fjalë për një kompanie të rëndësishme shtetërore ushtarake, e cila do çojë në një nivel të denjë për një vend anëtar të NATO armatimin, pajimet dhe uniformat e ushtrisë e të forcave të tjera të Sigurisë në Shqipëri. Madje sipas kryeministrit, objektivi kryesor i saj do të jetë prodhimi në vendin tonë i dronëve luftarak dhe i autoblindave.
Më herët Edi Rama duke folur për standardet e ushtrisë dhe policisë shqiptare në kuadrin e anëtarësimit në BE, ka folur për një epokë të re cilësore dhe dinjitoze të uniformave. Por duket se historia vazhdon: Premtime të reja, avazi i vjetër!
Çfarë është kompania “KAYO” në letra dhe cili është objektivi i saj
Kompania e prodhimit të armëve “KAYO” është regjistruar në Qendrën Kombëtare të Bizneseve në datë 16 tetor të vitit 2024, kurse data e themelimit të kompanisë është 24 shtatori 2024. Kompania KAYO do të drejtohet nga një bord me 7 anëtarë, teksa administrator do të jetë ish-drejtori i përgjithshëm i Policisë së Shtetit, Ardi Veliu. Ajo është krijuar me një kapital fillestar, prej 150 milionë lekësh.
Shoqëria “KAYO” ka objekt veprimtarie projektimin, prodhimin, riparimin, demilitarizimin, asgjësimin dhe tregtimin,brenda dhe jashtë vendit, të të gjitha llojeve të armëve ose pjesëve të armëve, përfshirë edhe armët ushtarake, të municioneve, të teknologjive dhe pajisjeve ushtarake, uniformat, mjetet, pajisjet dhe sistemet e armatimit e komunikimit si dhe çdo aktivitet të lidhur me këtë veprimtari, në funksion të politikave kombëtare të sigurisë e mbrojtjes dhe rritjes së kapaciteteve ushtarake.
Përgjatë zhvillimit të veprimtarisë së saj, Shoqëria ndjek gjithashtu interesa ekonomikë dhe tregtarë.
Kompani e re me ortakë të vjetër dhe si mund të bësh pa frikën prej SPAK, “korrupsion me ligj”
Pavarësisht ambicies dhe proklamimit të bujshëm që kryeministri Edi Rama i ka bërë “KAYO”, si një shoqëri e cila në bashkëpunim me kompani prestigjioze në botë do të prodhojë dronët e parë Made in Albania, se më në fund ushtarakët, policët dhe forcat e tjera të Sigurisë, do të kenë veshje dhe pajisje cilësore dhe dinjitoze si homologët në NATO dhe BE, puna e parë që ka bërë administratori i saj, Ardi Veliu, ka qenë krijimi i disa kompanive- ombrella, për të vazhduar aferat e vjetra korruptive me të njëjtët klientë, por këtë herë pa tenderime dhe prokurime publike. Pra krijimin e një monopoli, privat-shtet, në këtë fushë.
Subjekti “M.K.D.” me NUIS “M52008029J” është themeluar si shoqëri aksionere, në datën 01.08.2025, me objekt aktiviteti, prodhimin apo tregtimin e armëve dhe municioneve për forcat e armatosura të Republikës së Shqipërisë dhe strukturat e tjera të Sigurisë.
Subjekti “GUNA TACTICAL” me NUIS “M52008021O” është themeluar si shoqëri aksionere gjithashtu, në datën 01.08.2025, me objekt aktiviteti prodhimin apo tregtimin e uniformave dhe aksesorëve për forcat e armatosura të Republikës së Shqipërisë dhe strukturat e tjera të sigurisë.
E përbashkëta e krijimit të këtyre subjekteve, nuk është vetëm e njëjta datë e krijimit, por edhe se janë të njëjtët ortakë që kanë krijuar dy kompani.
“M.K.D” ka si ortakë aksionerë: 20 % kompaninë shtetërore, “KAYO” me NUIS “M42216020F”, me administrator Z. Ardi Veliu dhe 80% kompaninë private shqiptare, “MSSC (MILITARY SYSTEM SUPPLY COMPANY)” me NUIS “L01306040L”, me pronar të vetëm Z. Emiljano Dusha.
“GUNA TACTICAL” ka si ortake aksionere: 51 % kompaninë shtetërore “KAYO” me NUIS “M42216020F” me administrator Z. ArdiVeliu dhe 49% kompaninë private shqiptare “MSSC (MILITARY SYSTEM SUPPLY COMPANY)” me NUIS “L01306040L”, me pronar të vetëm, po Z. Emiljano Dusha.
Kush është “MSSC” me pronar të vetëm Emiljano Dusha, i cili është përzgjedhur si ortak nga KAYO?
Duke ju referuar të dhënave për transaksionet e Thesarit të Shtetit në website-in Open Spending Albania, kompania “MSSC (MILITARY SYSTEM SUPPLY COMPANY)” është një përfituese shumëvjeçare e fondeve të buxhetit të shtetit shqiptar. Kjo kompani është furnizuese e rregullt me armë dhe municione për forcat e armatosura dhe të sigurisë.
Kontratat e furnizimit që kjo kompani ka bërë me strukturat ushtarake dhe të sigurise kanë qenë me vlera të negociuara në menyre të drejtpërdrejtë dhe pa procedura tenderimi.
Vlera e kontratave të realizuara nga kjo kompani, vetëm në harkun kohor, 2018-2025, është 5’929’396’039 Leke të reja, apo rreth 59’000’000 Euro.
Gjatë periudhës, Tetor-Dhjetor 2024, (Ministria e Mbrojtjes është pronare e KAYO), nga strukturat e kësaj ministrie janë realizuar 7 (shtatë) kontrata me negocim me kompaninë “MSSC”, me një vlerë prej 577’567’186 Lekë të reja, apo rreth 6’000’000 Euro.
Gjatë periudhës, Korrik 2018- Dhjetor 2020, kur administrator aktual i kompanisë “KAYO”, Z. Ardi Veliu ka qenë Drejtor i Përgjithshem i Policisë së Shtetit, nga strukturat e kësaj policie janë realizuar 9 (nëntë) kontrata me negocim me kompanine “MSSC”, me një vlerë prej 309’254’013 Lekë të reja, apo rreth 3’000’000 Euro.
Cilat janë kriteret se si është përzgjedhur kompania private “MSSC” si ortake me kompaninë shtetërore“KAYO”?
Përzgjedhja e kompanisë “MSSC” është bërë në mënyrë të fshehtë, sipas preferencës së administratorit të kompanisë “KAYO”, Ardi Veliu.
Nëse në rastin e “M.K.D.” mund të ketë një numër të kufizuar kompanish me eksperiencë në prodhimin apo tregtimin e armëve dhe municioneve ushtarake, ndryshon situata me kompaninë tjetër “GUNA TACTICAL”.
Përzgjedhja e kompanisë “MSSC” si ortake e “KAYO” në krijimin e “GUNA TACTICAL”, si ndërmarrje ekskluzive për prodhimin apo tregtimin e uniformave dhe të aksesorëve ushtarakë për nevojat e forcave të armatosura dhe strukturave të tjera të sigurisë në Republikën e Shqipërisë, është një akt i pastër korruptiv, i pajustifikuar dhe i pambështetur në asnjë logjikë apo praktikë normale ligjore apo ekonomike, pa asnjë sens apo kriter.
Nuk është bërë asnjë njoftim apo ftesë për kompanitë shqiptarë të cilat kanë eksperiencë shumë-vjecare në prodhimin e uniformave ushtarake edhe të institucioneve të tjera të sigurisë. Disa prej këtyre kompanive kanë eksperiencën dhe aftësinë të prodhojnë me standardet dhe kërkesat e uniformave të NATO-s dhe aktualisht janë duke prodhuar uniforma për NATO-n.
Ndërkohë që në fshehtësi nga Ardi Veliu, për krijimin e “GUNA TACTICAL”, është përzgjedhur ortaku i armëve, Emiljano Dusha, pronar i vetëm i kompanisë shqiptare “MSSC”.
Aktiviteti kryesor i kompanisë “MSSC” është tregtimi i armëve dhe i pajisjeve ushtarake.
Nga kontratat e realizuara me shtetin gjatë viteve 2018-2025 me vlerën 59’000’000 Euro, nuk rezulton asnjë kontratë për uniforma ushtarake, apo të sigurisë.
Kjo kompani nuk zotëron një repart për prodhimin e uniformave ushtarake, apo të sigurisë. Pra, kjo kompani nuk ka eksperiencë apo historik në prodhimin e këtyre uniformave.
Pra me krijimin e “GUNA TACTICAL”, “MSSC” është zgjedhur si ortake e “KAYO” për të plotësuar në mënyrë eksluzive nevojat e forcave të armatosura dhe strukturave të tjera të sigurisë në Republikën e Shqipërisë.
Natyrisht që “GUNA TACTICAL” do të ketë kontrata të drejtpërdrejta dhe pa tender, duke vendosur Çmimet e uniformave dhe të pajisjeve sipas dëshirës.
Mjaftojnë faktet e mësipërme për të vërtetuar se “GUNA TACTICAL” nuk garanton cilësi apo standartet e uniformave, por garanton vetëm Çmime më të larta dhe më shumë fonde të vjedhura nga buxheti i shtetit.
Duket qartë skema. Ajo është krijuar në mënyrë të posaçme si një ombrellë dhe mekanizëm korruptiv, për të abuzuar dhe vjedhur në mënyrë të qetë dhe ligjore fondet e shtetit./Alfapress.al