Nën masa të rrepta sigurie dhe një perimetër të zgjeruar mbrojtës, ekspertë të specializuar mbërritën këtë të enjte në zonën industriale të Porto Romanos në Durrës, për të marrë mostra nga mbetjet e dyshuara toksike, të cilat janë depozituar atje prej më shumë se një viti.
Procesi, që pritet të zgjasë disa ditë, po zhvillohet me kujdes maksimal, për shkak të dyshimeve se mbetjet mund të jenë ngurtësuar gjatë kohës së qëndrimit, gjë që e vështirëson marrjen e kampionëve. Mostrat do të dërgohen për analizë të specializuar në një laborator në Itali, me qëllim identifikimin e përbërjes dhe vlerësimin e nivelit të mundshëm të toksicitetit.
Bëhet fjalë për rreth 2100 tonë mbetje të ndara në 102 konteinerë, të cilët u sekuestruan me urdhër të Prokurorisë pas kthimit të tyre në Portin e Durrësit. Vendimi për marrjen e mostrave është marrë nga Prokuroria e Durrësit, e cila po udhëheq hetimet për këtë çështje.
Së bashku me përfaqësues të prokurorisë, në terren ndodhen edhe ekspertë të laboratorit shkencor të Tiranës, të cilët po ndihmojnë në procesin teknik të hetimit. Rasti lidhet me hetimet mbi mbetjet e furrave të çelikut të metalurgjikut të Elbasanit.
Kujtojmë se në verën e vitit të kaluar, 102 konteinerë të nisur nga porti i Durrësit u kthyen pas nga Malajzia, pas dyshimeve se përmbanin lëndë të rrezikshme. Konteinerët u rikthyen në Durrës në fund të tetorit 2024 dhe më pas u zhvendosën në një ambient privat në Porto Romano, ku janë ruajtur nën mbikëqyrjen e forcave të rendit dhe kamerave të sigurisë.
