SPAK ka zbardhur vrasjen e Klevis Lleshit, i cili u zhduk në vitin 2020 dhe dy vite më vonë u gjet i groposur në një fshat të Kurbinit.
Prokuroria e Posaçme ka lëshuar katër urdhër-arreste, njëri prej të cilëve është ekzekutuar, ndërsa tre të tjerë janë ende në kërkim.
Mësohet se porositësi i vrasjes ka qenë Aurel Hoxha, pronar i lokalit “Monopol” në zonën e Myslym Shyrit në Tiranë. Burimet bëjnë me dije se ngjarja është zbardhur falë transkriptimeve të komunikimeve në SkyECC. Porositja e vrasjes dyshohet të jetë bërë si hakmarrje për ekzekutimin e Agim Hoxhës në vitin 2012.
Klevis Lleshi ishte djali i xhaxhait të Arben Lleshit. Ky i fundit, i cili humbi jetën në burgun e Peqinit, ishte 37 vjeç dhe me origjinë nga fshati Laç-Bruç i Matit. Ai ishte akuzuar dhe dënuar nga drejtësia britanike për vrasjen e bashkëkombasit të tij, Agim Hoxha, më 10 prill 2012.
Pas kësaj ngjarjeje nisi saga e gjatë e hakmarrjeve dhe vrasjeve në fisin Lleshi në Mat. Në vitin 2012 u ekzekutua me armë zjarri Xhavit Lleshi, xhaxhai i Arben Lleshit. Pesë vite më vonë, në vitin 2017, u vra në fshatin e lindjes Hajredin Lleshi, vëllai i Xhavitit dhe gjithashtu xhaxhai i Arbenit. Po atë vit u zhduk edhe Artan Lleshi, djali i Hajredinit, i cili nuk është gjendur deri më sot. Të njëjtin fat pati edhe Klevis Lleshi, i zhdukur në vitin 2020, trupi i të cilit u gjet më pas i groposur në pronën e dajave të Agim Hoxhës, viktimës së vrarë në Angli nga Arben Lleshi.
Hajredin Lleshi, i vrarë më 14 maj 2017 në fshatin Rukaj nga të paktën dy persona, ishte vëllai i tretë i familjes matjane që u ekzekutua. Atë mbrëmje, autorët e thirrën pranë banesës së tij dhe sapo ai doli në oborr, u qëllua me breshëri automatiku. Djali i viktimës njoftoi policinë, ndërsa nga ekspertiza u konstatua se mbi të ishin shkrepur të paktën 15 plumba. Autorët mbeten ende të paidentifikuar.