Drejtoria e Përgjithshme e Burgjeve ka bërë me dije se gjendja shëndetësore e të penduarit të Drejtësisë, Nuredin Dumani, është aktualisht e stabilizuar, pas shtrimit të tij me urgjencë në QSUT më 6 shtator.
Institucioni sqaron se Dumani u dërgua nga IEVP “Jordan Misja” drejt urgjencës në gjendje të pavetëdijshme dhe u shtrua në Reanimacionin Qendror të QSUT-së me diagnozën “gjendje stupor”.
“Pas ekzaminimeve dhe konsultave me mjekë specialistë, gjendja e tij u stabilizua. Ai u trajtua me medikamente si Ceftriaxone, Omeprazol dhe Enoksiparin dhe më 7 shtator doli nga spitali me rekomandim për vijim trajtimi në Qendrën Shëndetësore të Burgut”, thuhet në reagim.
Gjatë qëndrimit në QSUT, Dumani u konsultua me neurolog, toksikolog, kardiolog dhe anestezist-reanimator, ndërsa iu rekomandua kryerja e një EEG-je.
Pas daljes nga spitali, ai u paraqit në QSB, por refuzoi shtrimin në Spitalin e Burgut, gjë që është dokumentuar në orën 13:25 të datës 7 shtator.
Drejtoria e Burgjeve thekson se sipas dokumentacionit nuk janë evidentuar probleme të tjera shëndetësore dhe se gjendja e tij aktuale është e stabilizuar.