Pas kontrolleve të kryera në QSUT, mjekët kanë përfunduar se gjendja shëndetësore e të penduarit të drejtësisë, Nuredin Dumani, nuk kërkon trajtim spitalor. Top Channel raporton se ai është rikthyer menjëherë në qelinë e izoluar, ku mbahet nën masa të rrepta sigurie.
Analizat e shumta nuk kanë dhënë një diagnozë të qartë, megjithatë simptomat e raportuara, rrahje të shpejta të zemrës dhe humbje të vetëdijes mund të jenë pasojë e stresit, ushqimit apo mungesës së aktivitetit fizik. Kjo është hera e dytë që Dumani shfaq probleme të tilla, ndërsa edhe më herët mjekët e burgut 313 kishin rekomanduar një kontroll më të hollësishëm.
Zyrtarët e burgjeve këmbëngulin se ushqimi i tij është i siguruar nga familjarët dhe i kontrolluar, ndërkohë që Instituti i Mjekësisë Ligjore ka përjashtuar mundësinë e helmimit.
Aktualisht, Dumani mbahet në ambientet e dikurshme të 41-bisit, tashmë të përshtatura për të penduarit e drejtësisë me kërkesë të SPAK. Përveç tij, në këtë sektor ndodhen edhe 12 të penduar të tjerë, por Dumani dhe Erjon Alibej konsiderohen dëshmitarët më të fortë të strukturës antikorrupsion.
11 dosjet ku Dumani është dëshmitar i penduar
1. Dosja Nr.75 “Plumbi i artë”
2. Dosja Nr.75/1
3. Dosja Nr.75/2
4. Dosja Nr.75/3
5. Dosja Nr.75/4
6. Dosja Nr.75/5
7. Dosja “Metamorfoza”
8. Dosja kundër Bujar Gërmizit
9. Dosja kundër Elvis Doçit (Poja)
10. Dosja kundër grupit (Çopja)
11. Dosja kundër Elvis Doçit në Itali.