Qumësht i rrezikshëm për fëmijë, çfarë po shitet në Shqipëri
Brenda një periudhe të shkurtër kohore, dy marka të njohura qumështi formulë për foshnje janë përfshirë në njoftime zyrtare për probleme serioze sigurie, duke ngritur shqetësime te prindërit për produktet që përdoren për ushqimin e fëmijëve.
Autoriteti Kombëtar i Ushqimit bëri të ditur se, përmes Sistemit Evropian të Alarmit të Shpejtë për Ushqimin, RASFF, është raportuar prania e një toksine të rrezikshme në një tjetër formulë për bebe. Gjatë kontrolleve zyrtare të zhvilluara në Gjermani, është konstatuar prania e substancës cereulide, një toksinë e prodhuar nga bakteri Bacillus cereus, në një produkt të destinuar për foshnjat.
Bëhet fjalë për formulën APTAMIL 1 PRONUTRA 800 gram Advanced, me numër artikulli 172911 dhe datë skadence 10 nëntor 2026.
Sipas AKU, strukturat inspektuese janë angazhuar menjëherë në terren për verifikimin dhe tërheqjen e produktit nga tregu. Autoriteti u bën thirrje konsumatorëve që, nëse e kanë blerë këtë produkt dhe e mbajnë ende në përdorim, ta mos e konsumojnë dhe ta kthejnë pranë pikave të shitjes.
Ky rast shënon problematikën e dytë të evidentuar brenda një muaji në tregun e qumështit formulë për foshnje.
Disa ditë më parë, AKU kishte njoftuar tërheqjen e një lote të formulës “NAN 1 OPTIPRO” 800 gram, pas sinjalizimit të bërë nga vetë kompania prodhuese Nestlé.
Masa u mor në mënyrë parandaluese, pas zbulimit të pranisë së së njëjtës toksinë në ambientet e prodhimit në Holandë.
Në vijim të këtyre zhvillimeve, edhe disa subjekte tregtare që shpërndajnë këto marka kanë reaguar publikisht, duke njoftuar konsumatorët që produktet e blera të kthehen dhe të mos përdoren për ushqimin e foshnjave.
AKU bën me dije se gjatë kontrolleve në terren është konstatuar edhe afishimi i njoftimeve për konsumatorët në supermarketet ku këto produkte janë tregtuar. Sipas autoritetit, sasitë e tërhequra do të asgjësohen ose do të kthehen në vendin e origjinës.
Dy raste brenda një muaji kanë rikthyer në vëmendje sigurinë e ushqimit për foshnjat, duke shtuar nevojën që prindërit të jenë veçanërisht të kujdesshëm ndaj njoftimeve zyrtare dhe verifikimit të loteve të produkteve që përdorin për fëmijët e tyre.