Kush e merr Gardën e Republikës?
Këtë të enjte, në ambientet e Ministrisë së Brendshme, zhvillohet procesi i intervistimit të tetë kandidatëve që kanë aplikuar për pozicionin e Drejtorit të Përgjithshëm të Gardës së Republikës, pas dorëheqjes së Ermal Onuzit.
Ermal Onuzi dha dorëheqjen më 3 qershor të vitit të kaluar, pas vetëm 9 muajsh në krye të Gardës së Republikës.
Sipas njoftimit zyrtar, intervistimi i kandidatëve do të kryhet sipas rendit alfabetik. Kandidatët janë: Arian Sopiqoti, Denis Deliu, Faik Basha, Ilirjan Hasanaj, Liman Hoxha, Simon Zereci, Vasil Çuni dhe Zaje Osma.
Kush është Major Vasil Çuni që kandidon për kreun e Gardës së Republikës
Mes kandidatëve spikasin disa emra të njohur. Denis Deliu është ish-deputet i Partisë Socialiste, i cili hyri në Kuvend pas dorëheqjes së Lefter Maliqit, ndërsa prej vitesh ka qenë pjesë e Forcave të Armatosura. Faik Basha ka qenë anëtar i kryesisë së Partisë së Lirisë, por në prill të vitit të kaluar njoftoi largimin nga kjo forcë politike, pak para nisjes së fushatës zgjedhore të 11 majit.
Ndërkohë, Simon Zereci u komandua në krye të Gardës pas dorëheqjes së Onuzit dhe më herët ka mbajtur postin e Komandantit të Njësisë Speciale në Gardë. Liman Hoxha ka shërbyer si drejtor i Drejtorisë për Sigurinë e Personaliteteve të Larta Shtetërore në Gardën e Republikës së Shqipërisë.
Procesi i intervistimit pritet të përcaktojë drejtuesin e ri të institucionit përgjegjës për sigurinë e institucioneve dhe personaliteteve të larta shtetërore.