Bleu lirinë! Si e gjunjëzoi Gjykatën Darjo Jashari me 1 milionë euro

Bleu lirinë! Si e gjunjëzoi Gjykatën Darjo Jashari me 1 milionë euro

Gjykata e Posaçme ka vendosur më 7 mars të zëvendësojë masën e sigurisë “arrest në burg” për Darjo Jashari me një garanci pasurore prej 1 milion eurosh. Vendimi u dha nga gjyqtarja Flojera Davidhi.

Sipas njoftimit zyrtar të gjykatës, ndaj Jasharit është caktuar masa “garanci pasurore” në shumën 1,000,000 euro, duke lehtësuar kështu masën e mëparshme të arrestit me burg. Struktura e Posaçme kundër Korrupsionit dhe Krimit të Organizuar ka vënë nën hetim gjithsej 36 persona në lidhje me një skemë të dyshuar kontrabande ndërkombëtare të cigareve. Mes tyre, 29 janë punonjës të administratës doganore. Për 14 persona është caktuar masa “arrest në burg”, ndërsa për të tjerët janë vendosur masa më të lehta si detyrim paraqitjeje dhe ndalim i daljes jashtë vendit.

Sipas hetimeve, në qendër të kësaj skeme qëndron kompania “Albanian Tabak Fabrika e Cigareve”, në pronësi të mëparshme të Ilir Jashari dhe Darjo Jasharit. Në shkurt të vitit të kaluar, kompania u ble nga “EA TOBACCO”, në pronësi të Ergys Agasi, i cili më vonë u shpall në kërkim në një çështje tjetër që lidhet me manipulimin e tenderave të Agjencia Kombëtare e Shoqërisë së Informacionit.

Prokuroria pretendon se të dyshuarit kanë vepruar si pjesë e një grupi të strukturuar kriminal, duke organizuar kontrabandën e cigareve të prodhuara në Shqipëri drejt vendeve fqinje dhe më pas në Bashkimin Evropian. Skema dyshohet se është realizuar përmes një mekanizmi të sofistikuar që shfrytëzonte regjimin e “Përpunimit Aktiv”.

Sipas SPAK, kompania shqiptare kishte marrë autorizim për këtë regjim, duke prodhuar cigare për llogari të një kompanie të huaj. Megjithatë, hetimet kanë zbuluar se kjo marrëveshje ishte fiktive dhe synonte shmangien e detyrimeve doganore, ndërsa destinacionet e deklaruara të mallrave rezultonin të pavërteta.