Në kuadër të hetimeve që SPAK po zhvillon prej dy vitesh për tjetërsimin e pronave të ushtrisë në Sarandë, ditën e sotme janë ushtruar kontrolle në banesën dhe zyrën e biznesmenit Artan Dulaku. Burime bëjnë me dije se kontrollet janë kryer me kërkesë të prokurores Manjola Kajana dhe me vendim të Gjykatës së Posaçme Kundër Korrupsionit dhe Krimit të Organizuar (GJKKO), ndërsa agjentët e BKH-së janë mbështetur edhe nga Policia e Shtetit.
Në kuadër të këtyre hetimeve, me vendim të GJKKO-së është vënë nën sekuestro edhe Porti i Limionit, një bazë e Forcave Detare, pronë e ushtrisë shqiptare. Në korrik të vitit 2020, me vendim të qeverisë, baza iu dha me qira bashkimit të shoqërive “Concord Investment” sh.p.k. dhe “Kastrati Group” sh.a., përfaqësuar nga shoqëria “Marina Bay Saranda” sh.p.k., si qiramarrës, si pjesë e një territori mbi 265 mijë metra katrorë. Projekti parashikon ndërtimin e një kompleksi hotelesh, rezidencash dhe një porti jahtesh me kapacitet për 400 anije. Kërkesa e shoqërisë “Marina Bay Saranda” për heqjen e sekuestros së bazës detare është rrëzuar nga Gjykata Kushtetuese më 12 nëntor 2024.
Hetimi ka nisur pas kallëzimit në SPAK nga ish-zëvendëskomandanti i Forcës Detare, Artur Meçollari, në vitin 2021, i cili kundërshtonte vendimin e Këshillit të Ministrave. Ky vendim, i marrë më 1 korrik 2020, parashikonte dhënien me qira për 20 vjet të Bazës Detare Limion, me tarifë simbolike 1 euro, bashkimit të dy shoqërive. Aktualisht, baza detare e Sarandës do të qëndrojë e sekuestruar derisa Prokuroria e Posaçme të përfundojë hetimet lidhur me procedurat e ndjekura për dhënien me qira të pronës së ushtrisë.