Tensionet në fshatin Kurdari të njësisë administrative Suç në Klos u rikthyen mëngjesin e së shtunës. Dhjetëra banorë nga disa fshatra të zonës u mblodhën në lokalin e vetëm të fshatit dhe më pas u drejtuan drejt lumit të Lusës, ku bllokuan makineritë e shoqërisë “Global Interprise Group”. Shoqëria po përpiqet prej disa ditësh të rifillojë punimet për ndërtimin e HEC-it Doma, një projekt që ka hasur në kundërshtimin e vazhdueshëm të banorëve që prej momentit të shpalljes. Prej disa ditësh, shoqëria kishte nisur gërmimin e kanalit për vendosjen e një tubacioni rreth 4.4 kilometra të gjatë, i cili synon të devijojë rrjedhën natyrore të lumit.
Reagimi i banorëve vjen vetëm një ditë pas një incidenti të ndodhur të premten, gjatë të cilit disa prej tyre u konfliktuan fizikisht me punëtorët e kompanisë. Nga përplasja mbeti i lënduar vëllai i administratorit të kompanisë, i cili është gjithashtu aksioner në këtë investim dhe po punonte në terren si eskavatorist. Banorët pretenduan se vëllai i administratorit i kishte provokuar pasi ata i kanë kërkuar të largohet nga zona. Sipas tyre ai i ka ofenduar dhe ka tentuar t’i shtypë me mjetin e punës. Kjo ka sjellë përshkallëzim të situatës dhe përplasjen fizike.
Pas incidentit, Drejtoria Vendore e Policisë Dibër njoftoi se kishte referuar në prokurori materialet për nisjen e një procedimi penal në ngarkim të katër banorëve. “Specialistët për Hetimin e Krimeve të Komisariatit të Policisë Mat referuan materialet në Prokurori, ku nisi procedimi për veprat penale ‘Plagosja e lehtë me dashje’, ‘Vetëgjyqësia’ dhe ‘Shkatërrimi i pronës’ në ngarkim të shtetasve: H.B., 30 vjeç, S.Ç., 24 vjeç, L.B., 24 vjeç dhe L.K., 25 vjeç, të gjithë banues në Klos,” thuhet në njoftimin zyrtar të policisë.
Sipas DVP Dibër, këta persona, në bashkëpunim me njëri-tjetrin, dyshohet se kanë dëmtuar një automjet të kompanisë si dhe kanë goditur me grushta një 39-vjeçar, investitor i projektit. Të proceduarit u lanë të lirë në orët e vona të mbrëmjes dhe u pritën jashtë Komisariatit të Policisë Mat me brohorima nga dhjetëra bashkëfshatarë.
Për këtë incident, BIRN i është drejtuar me një kërkesë për koment edhe administratorit të kompanisë “Global Interprise Group”, Ashim Doma, por deri në momentin e publikimit të këtij lajmi nuk ka pasur përgjigje. Në një qëndrim të mëparshëm për BIRN, Doma kishte deklaruar se punimet për ndërtimin e HEC-it do të vazhdojnë, duke theksuar se gjurma e projektit ndodhet rreth 300 metra poshtë fshatit dhe, sipas tij, nuk prek askënd drejtpërdrejt. Ai kishte paralajmëruar gjithashtu se në rast pengesash, do të kërkonte ndërhyrjen e institucioneve ligjzbatuese.
HEC-i Doma është pjesë e një projekti më të gjerë për ndërtimin e tre hidrocentraleve në lumin e Lusës, që prej vitesh kundërshtohet nga banorët dhe aktivistët për mbrojtjen e burimeve natyrore. Banorët pretendojnë se ndërtimi po kryhet pa zhvilluar dëgjesa publike dhe pa pëlqimin e komunitetit, siç kërkohet me ligj. Ata shprehen të vendosur për të mos lejuar realizimin e projektit dhe i bëjnë thirrje SPAK-ut dhe institucioneve shtetërore të hetojnë procedurat e miratimit të tij.
