“Dua lekët e mija…”/ Si nisi sherri te Flar Boutique Hotel! Burime: Kamarieri qëlloi me gotë…
Detaje të reja mësohen nga ngjarja e rëndë e ndodhur në zonën e Malit të Robit, në Golem, ku një 18-vjeçar, i identifikuar si Genti Nela, u dhunua pas një konflikti të nisur në ambientet e hotelit “Flar Boutique Hotel”.
Sipas burimeve pranë hotelit, konflikti mes 18-vjeçarit dhe personave të pranishëm në ambientet e hotelit ka nisur pas një komunikimi lidhur me shkurtimet e stafit. Burimet bëjnë me dije se Gentit Nelës, i cili punonte si kamarier, i është komunikuar se do të ishte pjesë e punonjësve që do të largoheshin nga puna.
Në këtë moment, 18-vjeçari ka kërkuar që t’i jepej pagesa për ditët e punës që kishte kryer. Sipas të njëjtave burime, pronarët e hotelit i kanë komunikuar se pagesa do të bëhej në një moment të mëvonshëm, duke mos pranuar t’i jepnin menjëherë paratë.
Situata mësohet se është tensionuar më tej. Burime pranë “Flar Boutique Hotel” pretendojnë se Genti Nela ka marrë një gotë qelqi dhe e ka goditur në drejtim të personave që ndodheshin aty. Pas këtij veprimi, sipas burimeve, 18-vjeçari është dhunuar nga personat e përfshirë në konflikt.
Në përplasjen e mëtejshme mësohet se ka ndërhyrë edhe xhaxhai i 18-vjeçarit, Melison Nela, i cili tashmë është arrestuar nga policia. Ndërhyrja e tij nuk ka mundur të shuajë konfliktin, ndërsa situata dyshohet se është përshkallëzuar edhe më tej.
Si u rrah kamarieri te Flar Boutique Hotel në Golem! Pronarët nuk i dhanë rrogën
Sipas burimeve pranë hotelit, pas konfliktit, Melison Nela është nisur drejt hotelit i armatosur me një kallashnikov, me qëllim për t’u përballur me personat që kishin dhunuar nipin e tij. Policia ka ndërhyrë përpara se ai të mbërrinte në hotel, duke e ndaluar automjetin në afërsi të zonës.
Gjatë kontrollit në automjet, policia ka gjetur në një çantë shpine një kallashnikov, tre karikatorë dhe 84 fishekë.
Për dhunimin e 18-vjeçarit janë arrestuar Florian Habilaj, 28 vjeç, djali i pronarit të hotelit, dhe Enold Dragoti, 20 vjeç. Ndërkohë, Arbër Habilaj, 36 vjeç, djali tjetër i pronarit, është shpallur në kërkim, ndërsa dhëndri 36-vjeçar i pronarit po hetohet në gjendje të lirë.
Një tjetër element që po hetohet nga policia lidhet me kamerat e sigurisë. Gjatë kontrolleve, efektivët kanë konstatuar se ambienti ku kishte ndodhur konflikti ishte pastruar, ndërsa pajisja ku ruheshin pamjet e kamerave të sigurisë ishte hequr dhe kabllot ishin prerë.
Biznes elitar në Golem! Pronari nuk i jep pagesën dhe rreh kamarierin, xhaxhai shkon për t’i vrarë
Burime pranë “Flar Boutique Hotel” bëjnë gjithashtu me dije se Genti Nela është djali i një oficeri policie. Ky detaj, si edhe rrethanat e plota të konfliktit, pritet të jenë pjesë e hetimit të autoriteteve.
Ngjarja po hetohet nga policia dhe organet e drejtësisë, ndërsa versionet e palëve dhe përgjegjësitë konkrete të secilit prej personave të përfshirë pritet të përcaktohen në vijim të hetimeve.
