Një ngjarje e rëndë është parandaluar në zonën e Golemit, e cila mund të kishte përfunduar në tragjedi. Një 18-vjeçar, i identifikuar si Genti Nela, i cili punonte si kamerier në lokalin e hotelit “Flar”, në zonën e Malit të Robit, dyshohet se është dhunuar pasi ka kërkuar pagën e tij.

Sipas policisë, i riu është goditur nga dy djemtë dhe dhëndri i pronarit të hotelit, si edhe nga një 20-vjeçar, shok i tyre.

Pas marrjes së informacionit për dhunimin e nipit të tij, xhaxhai i 18-vjeçarit, 47-vjeçari Melison Nela, është nisur i armatosur drejt hotelit, me qëllim hakmarrjen ndaj personave që kishin dhunuar të riun.

Biznes elitar në Golem! Pronari nuk i jep pagesën dhe rreh kamarierin, xhaxhai shkon për t’i vrarë

Policia ka ndërhyrë në kohë, duke ndaluar automjetin e 47-vjeçarit pranë zonës, përpara se ai të mbërrinte në hotel. Gjatë kontrollit të automjetit, në një çantë shpine u gjet një kallashnikov, tre karikatorë dhe 84 fishekë.

Melison Nela u arrestua nga policia, ndërsa për dhunimin e 18-vjeçarit u arrestuan Florian Habilaj, 28 vjeç, djali i pronarit të hotelit, dhe Enold Dragoti, 20 vjeç. Ndërkohë, Arbër Habilaj, 36 vjeç, djali tjetër i pronarit, është shpallur në kërkim.

Dhëndëri 36-vjeçar i pronarit të hotelit po hetohet në gjendje të lirë.

Gjatë kontrolleve në hotel, policia konstatoi se vendi ku kishte ndodhur konflikti ishte pastruar. Gjithashtu, ishte hequr pajisja ku ruheshin pamjet e kamerave të sigurisë, ndërsa kabllot e kamerave ishin prerë.

Hetimet vijojnë për zbardhjen e plotë të rrethanave të ngjarjes dhe përcaktimin e përgjegjësive për personat e përfshirë.