TIRANË- Prokuroria e Posaçme kundër Korrupsionit dhe Krimit të Organizuar ka kërkuar në Gjykatën e Posaçme të Shkallës së Parë caktimin e masave të sigurimit ndaj Marsel dhe Ermal Liçajt.
Prokuroria e Posaçme kundër Korrupsionit dhe Krimit të Organizuar ka paraqitur në Gjykatën e Posaçme të Shkallës së Parë kërkesën për caktimin e masave të sigurimit për dy shtetas, M. L. (alias G.) dhe E. L., në kuadër të procedimit nr. 55 të vitit 2024, për veprat penale:
“Prodhim dhe shitje e narkotikëve”, në formën e bashkëpunimit si grup i strukturuar kriminal, sipas nenit 283/1 dhe 28/4 të Kodit Penal, lidhur me nenin 334/1 të Kodit Penal “Kryerje e veprave penale nga organizata kriminale ose grup i strukturuar kriminal”;
“Grup i strukturuar kriminal”, në formën e pjesëmarrjes, sipas nenit 333/a/2 të Kodit Penal.
Pas kërkesës së Prokurorisë së Posaçme, Gjykata, me vendimin nr. 28, datë 14.5.2026, vendosi të caktojë masën e sigurisë personale me karakter shtrëngues “arrest në burg” për shtetasin M. L. (alias G.), si dhe masat e sigurimit personal “Detyrimi për t’u paraqitur në policinë gjyqësore” dhe “Ndalimi i daljes jashtë shtetit” për shtetasin E. L., sipas nenit 234 dhe 233 të Kodit të Procedurës Penale.
Hetimet për këtë procedim penal janë zhvilluar në bashkëpunim të ngushtë me autoritetet e drejtësisë daneze dhe Byronë Kombëtare të Hetimit (BKH).
Autoritetet daneze, gjatë muajit gusht të vitit 2023, kanë regjistruar procedimin penal nr. 0100-71282-00102-23 – “Operacioni Bacchus”. Në hetim ishin të përfshirë disa shtetas shqiptarë dhe të huaj, të cilët, brenda grupit të strukturuar kriminal, kishin angazhuar aktivitetin e trafikimit dhe shpërndarjes së heroinës në Mbretërinë e Danimarkës.
Aktiviteti i paligjshëm ka zgjatur nga 1 tetor 2023 deri më 23 janar 2024, në 7 episode, ku anëtarët e grupit kriminal kanë importuar heroinë në Mbretërinë e Danimarkës përmes Suedisë. Droga e trafikuar përgatitej për tregun danez, duke u përzier me substanca të tjera si paracetamol dhe kafeinë, për të maksimizuar fitimet.
Nga hetimet paralele të realizuara nga prokuroritë e dy vendeve, deri tani janë identifikuar dhe proceduar në Danimarkë 3 individë (dy shqiptarë dhe një i huaj), ndërsa në Shqipëri janë identifikuar 2 shtetas të tjerë shqiptarë, të cilët ishin të përfshirë në aktivitetin e paligjshëm të prodhimit dhe shitjes së narkotikëve.
Më 14.5.2026, Drejtoria e Përgjithshme e Policisë së Shtetit ka realizuar ekzekutimin e masave të sigurimit personal për të dy shtetasit e hetuar.
Në ndërkohë, hetimet vazhdojnë për mbledhjen e provave lidhur me përfshirjen e personave të tjerë, të cilët dyshohet se janë angazhuar në këto aktivitete të paligjshme.
Prokuroria e Posaçme shpreh falënderimet e saj për autoritetet daneze dhe Drejtorinë e Përgjithshme të Policisë së Shtetit për mbështetje.
