Thellohet skandali i Drejtuesit të Prokurorisë Dibër Abaz Muça. Pas përplasjes me prokurorin Urim Kalia për një çështje hetimore dhe nisjes së procedimit penal për të, Abaz Muça ka shkarkuar nga detyra dy sekretarët e prokurorisë.
Edvin Shehu dhe Artan Balla janë shkarkuar në mënyrë të beftë, pasi nuk e kanë informuar Abaz Muçën se ndaj tij kishte nisur një procedim penal.
Përplasja dhe debatet e Drejtuesit me këta dy punonjës kanë nisur ditën që prokurori Urim Kalia ka nisur procedimin penal ndaj tij dhe kanë vazhduar disa ditë më pas.
Drejtuesi Abaz Muça me veprimet e tij ka penguar sekretarin Edvin Shehu që të fotokopjojë materialin e procedimit penal ndaj tij, duke e detyruar më pas prokurorin Urim Kalia të shkojë në zyrën e Drejtuesit për t’ia marrë me forcë materialin që po fotokopjohej. Një procedurë rutinë dhe një sherr banal mes dy funksionarëve të lartë të shtetit në Dibër tregon qartë fytyrën e institucioneve të drejtësisë në Shqipëri sapo largohesh pak nga qendra.
E gjithë skena është regjistruar nga kamerat e vendosura në ambientet e kësaj Prokurorie, të cilat do të shërbejnë si provë për të faktuar konsumimin rishtas të veprës penale “shpërdorim detyre”, për hakmarrje ndaj 2 sekretarëve.
Për këtë përplasje të radhës janë informuar institucionet si KLP dhe ILD, ndërsa prokuroria e Kukësit ka në duar dosjen penale ndaj kryeprokurorit të Dibrës. Si KLP dhe ILD ende nuk kanë bërë asnjë reagim për çështjen, ndërsa të vetmet reagime janë ato të mbërritura nga media. E pakuptueshme se si dy institucionet përgjegjëse për mbarëvajtjen e drejtësisë heshtin, ndërkohë që situata në Dibër mund të përshkallëzohet edhe më tej.